டெல்லியில் ஐஏஎஸ் பயிற்சி மையத்தில் படித்துவந்த ஈரோடு மாவட்டத்தைச் சேர்ந்த மாணவி ஸ்ரீமதி சடலமாக மீட்கப்பட்டார். அவரது உடல் இன்று அதிகாலையில் சொந்த ஊர் கொண்டு வரப்பட்டு, உடனடியாக தகனம் செய்யப்பட்டது.
ஈரோடு மாவட்டம் சத்தியமங்கலத்தைச் சேர்ந்த ஸ்ரீமதி, டெல்லியில் உள்ள ஐஏஎஸ் பயிற்சி மையத்தில் கடந்த 6 மாதங்களாக படித்து வந்தார். பயிற்சி மையத்திற்கு அருகில் உள்ள வீடு ஒன்றில் அவர் தனியாக தங்கியிருந்தார். இந்த நிலையில் சனிக்கிழமை மாலையில் தோழி ஒருவர் அவரின் அறைக்குச் சென்றுள்ளார். அப்போது ஸ்ரீமதி சடலமாக இருந்ததைக் கண்டு அவர் அதிர்ச்சியடைந்தார்.
தகவல் அறிந்து டெல்லி காவல்துறையினர் உடலை பிரேத பரிசோதனைக்கு அனுப்பி வைத்தனர். முதற்கட்ட விசாரணையில், மாணவி ஸ்ரீமதி தூக்கிட்டு தற்கொலை செய்துகொண்டது தெரியவந்தது. பிரேத பரிசோதனைக்கு பின் மாணவியின் உடல் அவரின் தந்தை தங்கராஜிடம் ஒப்படைக்கப்பட்டது. மாணவியின் உடல் டெல்லியில் இருந்து சொந்த ஊருக்கு இன்று அதிகாலையில் கொண்டு வரப்பட்டது. பின்னர் இறுதிச்சடங்குகள் நடைபெற்று உடல் உடனடியாக தகனம் செய்யப்பட்டது.
இதனிடையே மாணவி தங்கியிருந்த அறையில் இருந்து தற்கொலை கடிதம் கைப்பற்றப்பட்டுள்ளதாக கூறப்படுகிறது. என்னை மன்னித்து விடுங்கள் என பெற்றோரிடம் மாணவி வருத்தம் தெரிவித்திருப்பதாகவும், தம்பியை நன்றாக பார்த்துக்கொள்ளுங்கள் என்றும் அந்தக் கடிதத்தில் கூறியிருப்பதாக தெரிகிறது.
