எஸ்பிபியை போற்றுவதே நம் கடமை; அவரது இறுதி பயணத்தை அரசு மரியாதையோடு அனுப்பி வைப்பதே நமது பெருமை என நாம் தமிழர் கட்சியின் சீமான் தெரிவித்துள்ளார்.
இதுகுறித்து அவர் வெளியிட்டுள்ள இரங்கல் செய்தியில், “எஸ்பிபி மறைவு குறித்த செய்தி கேட்டு பேரதிர்ச்சி அடைந்தேன். தனது பாடல்கள் மூலம் மக்களின் மனத்துயரத்தை துடைத்தெறிந்தவர். அவரது குடும்பத்தினருக்கும் கோடிக்கணக்கான ரசிகர்களுக்கும் ஆழ்ந்த இரங்கலை தெரிவித்து துயரத்தில் பங்கெடுக்கிறேன். அவரது மறைவு இசயுலகிற்கு பேரிழப்பு. மண்ணை விட்டு மறைந்தாலும் காற்றில் கரைந்திடா அவரது கானங்கள் மூலம் காலங்கள் கடந்து வாழந்து கொண்டிருப்பார்.
கலை, இலக்கியத்தை போற்றாத எந்த சமுதாயமும் மேம்படாது. எஸ்பிபியை போற்றுவதே நம் கடமை; அவரது இறுதி பயணத்தை அரசு மரியாதையோடு அனுப்பி வைப்பதே நமது பெருமை. எனவே அவரது இறுதி ஊர்வலைத்தை அரசு மரியாதையோடு அனுப்பி வைக்க வேண்டும் என வலியுறுத்துகிறேன்” எனத் தெரிவித்துள்ளார்.
