கோவை மாவட்டம் சாமிசெட்டிப்பாளையத்தில் 2 பெண்களை தனது குட்டியுடன் வந்த யானை வீதியில் வைத்து தாக்கும் காட்சிகள் வெளியாகி உள்ளன.
கோவை மாவட்டம் மேட்டுப்பாளையம் அருகே அதிகாலை முதலே சுற்றிவரும் காட்டு யானையால் அந்தப் பகுதி முழுவதும் பரப்பரப்பு ஏற்பட்டுள்ளது. குடியிருப்புகளுக்கு மத்தியில் அந்த யானை நடமாடி வருவதால், அதனை விரட்டுவதில் வனத்துறையினர் தொடர்ந்து ஈடுபட்டு வருகின்றனர். இந்நிலையில் குட்டியுடன் உள்ள பெண் யானை இன்று அதிகாலை சாமிசெட்டிபாளையத்தில் 2 பெண்களை தாக்கியது. இதில் படுகாயமடைந்த ராமாத்தாள் என்ற பெண் உயிரிழந்தார். மற்றொருவர் கோவை அரசு மருத்துவமனையில் தொடர்ந்து சிகிச்சை பெற்று வருகிறார்
இந்நிலையில் பெண்கள் யானையால் கொடூரமாக தாக்கப்படும் வீடியோ காட்சிகள் தற்போது வெளியாகி உள்ளன. அதில் யானையால் தாக்கப்பட்டவர்கள் அலறுவதும் அதை பார்த்து பக்கத்து வீட்டார் பதறும் காட்சிகளும் பதிவாகியுள்ளன. யானை தங்களை தாக்குமோ என்ற அச்சமடைந்துள்ள நேரத்திலும் யானையை கணேசனே சென்றுவிடு என்று மனதுருக வேண்டுவதும் அந்தக் காட்சியில் பதிவாகியுள்ளது. பார்ப்பவர்களை பதைபதைக்க வைக்கும் இந்த வீடியோ காட்சிகளை பக்கத்து வீட்டில் இருப்பவர்கள் தங்களின் மொபைல் போனில் பதிவு செய்துள்ளனர். தற்போது அந்த வீடியோ வெளியாகி யானையின் மீது பொதுமக்களுக்கு இருக்கும் அச்சத்தை அதிகபடுத்தி உள்ளது.
