மழை காரணமாக சென்னை உள்ளிட்ட சில மாவட்டங்களில் பள்ளி, கல்லூரிகளுக்கு இன்று விடுமுறை அறிவிக்கப்பட்டுள்ளது.
வங்கக்கடலில் நிலை கொண்டிருக்கும் வலுவான காற்றழுத்த தாழ்வுப்பகுதி காரணமாக தமிழகத்தின் பல பகுதிகளில் மழை பெய்து வருகிறது. சென்னையில் தொடர்ந்து 3-வது நாளாக மழை பெய்து வருகிறது. மழை காரணமாக சென்னை உள்ளிட்ட சில மாவட்டங்களில் பள்ளி, கல்லூரிகளுக்கு இன்று விடுமுறை அறிவிக்கப்பட்டுள்ளது.
அதன்படி சென்னை, காஞ்சிபுரம், திருவள்ளூர், விழுப்புரம், திருவண்ணாமலை மாவட்டங்களில் உள்ள பள்ளி, கல்லூரிகளுக்கு இன்று விடுமுறை அறிவிக்கப்பட்டுள்ளது. வேலூர், திருவாரூர் மாவட்டங்களிலும், புதுச்சேரியிலும் பள்ளிகளுக்கு மட்டும் விடுமுறை அறிவிக்கப்பட்டுள்ளது. அந்தந்த மாவட்ட ஆட்சியர்கள் இதற்கான உத்தரவை பிறப்பித்துள்ளனர்.
மேலும் அந்த மாவட்டத்தில் நிவாரண முகாம்கள் அமைந்துள்ள கல்லூரிகளுக்கும் விடுமுறை அறிவிக்கப்பட்டுள்ளது. நாகை வருவாய் கோட்டத்திற்கு உட்பட்ட பள்ளிகளுக்கும் இன்று விடுமுறை அறிவிக்கப்பட்டுள்ளது.
தேர்வுகளும் ஒத்திவைப்பு
அண்ணா பல்கலைக்கழக தேர்வுகள் புதுக்கோட்டை, நாகை, திருவாரூர் மாவட்டங்களில் மட்டும் ஒத்திவைக்கப்படுவதாக அறிவிக்கப்பட்டுள்ளது. இந்த மூன்று மாவட்டங்களில் மட்டும் இன்றும், நாளையும் நடைபெறவிருந்த தேர்வுகள் ஒத்திவைக்கப்படுவதாகவும், இதர மாவட்டங்களில் திட்டமிட்டபடி தேர்வு நடைபெறும் என்றும் தெரிவிக்கப்பட்டுள்ளது. ஒத்திவைக்கப்பட்ட மாவட்டங்களில் புதிய வினாத்தாளுடன் பின்னர் அறிவிக்கப்படும் தேதிகளில் தேர்வு நடைபெறுமென அண்ணா பல்கலைக்கழகம் தெரிவித்துள்ளது.
Read Also -> நாய்க்கறி விவகாரம்.. ராஜஸ்தான் விரைகிறது தனிப்படை..!
இன்று நடைபெறவிருந்த சட்டப் பல்கலைக்கழக தேர்வுகள் அனைத்தும் ஒத்திவைக்கப்படுவதாக அறிவிக்கப்பட்டுள்ளது. தேர்வு தேதி பின்னர் தேதி அறிவிக்கப்படும் எனவும் கூறப்பட்டுள்ளது.
இதேபோல சென்னை பல்கலைக்கழக தேர்வுகளும் ஒத்திவைக்கப்பட்டுள்ளது. ஒத்திவைக்கப்பட்ட தேர்வுக்கான தேதி பின்னர் அறிவிக்கப்படும் எனவும் கூறப்பட்டுள்ளது.
