வேலூர் குடியாத்தம் அருகே சாலையோரத்தில் கிடந்த பச்சிளம் குழந்தை மீட்கப்பட்டது.
வேலூர் மாவட்டம் குடியாத்தம் அருகேயுள்ள சேத்துவண்டை பகுதியில் உள்ள பேருந்து நிலையத்தின் அருகில் சாலையோரத்தில் குழந்தையின் அழுகுரல் கேட்டுள்ளது. நீண்ட நேரம் கேட்கவே சந்தேகமடைந்த பொதுமக்கள் அங்குச் சென்று பார்த்துள்ளனர். அப்போது அங்கு பிறந்து சில மணி நேரங்களே ஆன ஆண் குழந்தை ஒன்று யாருமின்று அழுதுகொண்டு இருந்துள்ளது. இதைக்கண்ட மக்கள் அளித்த தகவலின் பேரில், விரைந்து வந்த 108 ஆம்புலன் ஊழியர்கள் குழந்தையை மீட்டு அரசு மருத்துவமனையில் அனுமதித்தனர்.
இதுதொடர்பாக வழக்குப் பதிவுசெய்துள்ள போலீஸார், குழந்தையைக் கண்டெடுத்தது தொடர்பாக மாவட்ட ஆட்சியருக்குத் தகவல் கொடுக்கப்பட்டுள்ளதாக தெரிவித்தனர். அத்துடன் குழந்தையை வீசிச் சென்றது யார் என விசாரித்து வருவதாகவும் கூறியுள்ளனர்.
