கோவையிலும் நீட் தேர்வில் ஆள்மாறாட்டம் செய்து இருவர் தனியார் மருத்துவக் கல்லூரியில் சேர்ந்திருப்பதாகப் புகார் எழுந்துள்ளது.
கோவை தனியார் மருத்துவக் கல்லூரியில் படிக்கும் ஒரு மாணவி, ஒரு மாணவர் மீது சந்தேகம் இருப்பதாக புகார் எழுந்துள்ளது. இது தொடர்பாக மருத்துவக் கல்வி இயக்குநரகத்திற்கு தனியார் மருத்துவக் கல்லூரி சார்பில் கடிதம் அனுப்பப்பட்டுள்ளது.
தேர்வு அனுமதிச்சீட்டு புகைப்படத்திற்கும், தற்போதைய புகைப்படத்திற்கும் முரண்பாடு இருப்பதாக கூறப்பட்டுள்ளது. ஆனாலும் சான்றிதழ்களில் பழைய புகைப்படத்தை ஒட்டியிருப்பார்கள் என்பதால் மீண்டும் சரிபார்க்க அறிவுறுத்தப்பட்டுள்ளது என்றும் புகைப்படத்தில் சற்று மாறுதல் இருப்பதால் ஆள்மாறாட்டம் என்ற முடிவுக்கு வர முடியாது என்றும் மருத்துவக் கல்வி இயக்குநர் நாராணபாபு தெரிவித்துள்ளார்.
முன்னதாக நீட் தேர்வு மூலம் ஆள்மாறாட்டம் செய்து தேனி மருத்துவக் கல்லூரியில் உதித் சூர்யா என்ற மாணவர் சேர்ந்ததாக புகார் எழுந்தது. இதனை அடுத்து உதித் சூர்யாவை கைது செய்த சிபிசிஐடி போலீசார் இன்று அவரிடம் விசாரணை மேற்கொள்ள உள்ளனர் என்பது குறிப்பிடத்தக்கது.
