தேசிய அளவில் நதிகளை இணைக்க மத்திய அரசை தமிழக அரசு வலியுறுத்தி வருகிறது. இணைப்புக்கு தமிழக அரசு ஆதரவு அளிக்கிறது என முதல்வர் பழனிசாமி கூறினார்.
சென்னை-நந்தனத்தில் நதிகளை மீட்போம் பேரணி கூட்டம் நடந்தது. இந்த விழிப்புணர்வு கூட்டத்திற்கு நதிகளை மீட்போம், பாரதம் காப்போம் இயக்கம் ஏற்பாடு செய்திருந்தது. கன்னியாகுமரி முதல் இமயமலை வரை நதிகளை இணைக்க வலியுறுத்தி இக்கூட்டம் நடைபெறுகிறது. இதில் ஈஷா யோகா மைய நிறுவனர் சத்குரு ,அப்பல்லோ குழும தலைவர் பிரதாப் ரெட்டி, முதல்வர் பழனிசாமி, துணை முதல்வர் பன்னீர் செல்வம் உள்ளிட்ட பலர் இக்கூட்டத்தில் பங்கேற்றனர்.
கூட்டத்தில் பேசிய முதல்வர் பழனிசாமி, "நதிகளை மீட்பது குறித்து தேசிய இயக்கம் செயல்பட்டு வருகிறது. இவ்விழாவில் பங்கேற்பது மகிழ்ச்சி அளிக்கிறது. மரங்கள் நடுவதில் ஜெயலலிதா மிகுந்த ஆர்வம் கொண்டிருந்தார். நீர் நிலைகளை மீட்டெடுக்கும் பணிகளை தமிழக அரசு மேற்கொண்டுள்ளது. தேசிய அளவில் நதிகளை இணைக்க மத்திய அரசை தமிழக அரசு வலியுறுத்தி வருகிறது. நதிகளை இணைக்க மத்திய அரசு புதிய சட்டத்தை கொண்டு வரவேண்டும்" என அவர் தெரிவித்தார்.
