தூத்துக்குடி மாவட்டத்தைச் சேர்ந்த விசைப்படகு மீது இன்று அதிகாலை கப்பல் மோதிய விபத்தில் மீனவர் ஒருவர் உயிரிழந்தார்.
கன்னியாகுமரி ஆழ்கடல் பகுதியில் 70 நாட்டிக்கல் மைல் தொலைவில், தூத்துக்குடி மாவட்டம் தருவைக்குளம் பகுதியைச் சேர்ந்த 8 மீனவர்கள் விசைப்படகில் மீன்பிடித்துக் கொண்டிருந்தனர். அப்போது அந்த வழியாக வந்த கப்பல், விசைப் படகில் மோதியதில், படகில் இருந்த மீனவர்கள் கடலில் விழுந்துள்ளனர். அவ்வழியாக வந்த வேறொரு கப்பலில் இருந்தவர்கள், உயிருக்கு போராடிக் கொண்டிருந்த மீனவர்களை மீட்டிருக்கின்றனர். அதில், 6 மீனவர்கள் உயிருடன் மீட்கப்பட்ட நிலையில், ஒருவர் உயிரிழந்தார். மற்றொருவர் காணாமல் போனார். தகவலறிந்து சென்ற தருவைக்குளத்தைச் சேர்ந்த மீனவர்கள், கப்பலில் இருந்த 6 மீனவர்கள் மற்றும் உயிரிழந்த மீனவரின் உடலை சின்னமுட்டம் மீன்பிடித் துறைமுகத்திற்கு கொண்டு வந்துள்ளனர். காணாமல்போன மீனவரை கண்டுபிடித்துத் தருமாறு சக மீனவர்கள் கோரிக்கை வைத்துள்ளனர்.
