செய்தியாளர்: வி.பி.கண்ணன்
அதிமுக ஆட்சியில் போக்குவரத்துத் துறை அமைச்சராக இருந்தவர் எம்.ஆர்.விஜயபாஸ்கர். இவர் 100 கோடி ரூபாய் மதிப்புள்ள 22 ஏக்கர் நிலத்தை போலி ஆவணங்கள் மூலம் அபகரித்துக் கொண்டதாக கரூரைச் சேர்ந்த பிரகாஷ் என்பவர் நகர காவல்நிலையத்தில் புகாரளித்தார். இதன் பேரில் 7 நபர்கள் மீது வழக்குப்பதிவு செய்யப்பட்டது. அதனை தொடர்ந்து வழக்கு சிபிசிஐடி விசாரணைக்கு மாற்றப்பட்டது.
இந்நிலையில், நில அபகரிப்பு வழக்கில் முன்னாள் அமைச்சர் எம்.ஆர்.விஜயபாஸ்கர் கரூர் மாவட்ட முதன்மை அமர்வு நீதிமன்றத்தில் முன்ஜாமீன் கேட்டு மனு தாக்கல் செய்திருந்தார். வழக்கு விசாரணை 4 முறை ஒத்திவைக்கப்பட்ட நிலையில், நீதிபதி சண்முக சுந்தரம் முன்ஜாமீன் மனுவை விசாரித்தார். அப்போது எம்.ஆர்.விஜயபாஸ்கரின் மனுவை தள்ளுபடி செய்து உத்தரவிட்டார்.
இதனிடையே எம்.ஆர்.விஜயபாஸ்கரை கைது செய்ய காவல்துறையினர் தீவிரம் காட்டியுள்ள நிலையில், அவர் தலைமறைவாகி உள்ளதாக கூறப்படுகிறது.
