செய்தியாளர்: D.சாம்ராஜ்
சத்தியமங்கலம் புலிகள் காப்பகம் கடம்பூர் மலைப்பகுதி குரும்பூர் கிராமத்தைச் சேர்ந்தவர் சுப்பிரமணி. இவர் தனது தோட்டத்தில் மக்காச்சோளம் பயிரிட்டுள்ளார். கதிர்கள் முற்றிய நிலையில் உள்ள அவற்றை, காட்டு பன்றிகள் தினந்தோறும் தோட்டத்துக்குள் புகுந்து சேதப்படுத்தி வந்துள்ளன. இதனால் காட்டுப் பன்றிகளை கட்டுப்படுத்த தோட்டத்தை சுற்றி மின்வேலி அமைத்து அதில் மின்சாரம் பாய்ச்சியுள்ளார் சுப்பிரமணி.
இந்நிலையில் இன்று அதிகாலை குரும்பூர் வனத்தில் இருந்து வெளியேறிய காட்டு யானை ஒன்று சுப்பிரமணியம் மக்காச்சோள காட்டுக்குள் புகுந்த போது மின்வேலியில் சிக்கி சம்பவ இடத்திலேயே உயிரிழந்தது.
அங்கு வந்த கடம்பூர் வனத்துறையினர் சம்பவ இடத்துக்கு சென்று யானையின் உடலை கைப்பற்றி விசாரித்து வருகின்றனர். கால்நடை மருத்துவர் சதாசிவம் தலைமையிலான மருத்துவ குழுவினர் யானையின் உடலை உடற்கூறு ஆய்வு செய்ய உள்ளனர். யானை உயிரிழந்தது தொடர்பாக தோட்டத்து உரிமையாளர் சுப்பிரமணியை வனத்துறை தேடி வருகின்றனர்.
