எந்தத் தோல்வியும் எங்களைத் துவளச் செய்யாது என்று தமிழக பாஜக தலைவர் தமிழிசை தெரிவித்துள்ளார்.
ஐந்து மாநிலத் தேர்தல் முடிவுகள் இன்று காலை வெளியாகி வருகின்றது. இதில் பாஜக ஆட்சி செய்த ராஜஸ்தான், மத்திய பிரதேசம், சத்தீஸ்கர் மாநிலங்களில் காங்கிரஸ் முன்னிலை வகிக்கிறது. காங்கிரஸ் தொண்டர்கள் இதை கொண்டாடி வருகின்றனர். பாஜகவின் இந்த தோல்வி நாடாளுமன்ற தேர்தலிலும் எதிரொலிக்கும் என்று கூறப்படுகிறது.
இந்நிலையில் இந்த தேர்தல் முடிவுகள் பற்றி தமிழக பாஜக தலைவர் தமிழிசை சவுந்தரராஜன் செய்தியாளர்களிடம் கூறும்போது, ’’இது மோசமான தோல்வி இல்லை. எந்த தோல்வியும் எங்களை துவளச் செய்யாது. வெற்றியால் பாஜக துள்ளிக் குதிப்பதும் இல்லை. தோல்வி வந்தால் துவண்டுபோவதும் இல்லை. பாஜக வெற்றிபெறும்போது வாக்குப்பதிவு இயந்திரங்களை குறை கூறும் காங்கிரஸ், இப்போது என்ன சொல்ல போகிறது? வாக்குப்பதிவு இயந்திரத்தை குறை கூறிய காங்கிரஸ் கட்சி பகிரங்க மன்னிப்புக் கேட்க வேண்டும்.
அந்த இயந்திரத்தின் நம்பகத் தன்மை நிரூபணமாகி உள்ளது. இந்த மாநிலத் தேர்தல் முடிவுகள், மக்களவைத் தேர்தலை பாதிக்காது. மோடி அலை ஓயவே ஓயாது. அதை ஓய வைக்க பெரிய தலை வேறு எந்தக் கட்சியிலும் இல்லை’ என்றார்.
