கொரோனா விரைவுச் செய்திகள் மே 18 - சென்னை இ-பதிவு 'அவதி' முதல் மோடி ஆலோசனை வரை!

தமிழகத்தில் கொரோனா தொற்று தொடர்ந்து 3ஆவது நாளாக குறைந்து 33,059 ஆக பதிவாகியுள்ளது. இதுவரையிலான கொரோனா பாதிப்பு 16,64.350 ஆக அதிகரித்துள்ளது. 12 வயதுக்கு உட்பட்ட 1,296 சிறார்கள் ஒரே நாளில் நோய் தொற்றுக்கு ஆளாகியுள்ளனர். சிகிச்சையில் இருந்தவர்களில் 21,362 பேர் குணமடைந்து வீடு திரும்பியுள்ளனர். இதுவரை 14,03,52 பேர் டிஸ்சார்ஜ் செய்யப்பட்டுள்ளனர். உயிரிழப்புகள் எண்ணிக்கையும் இதுவரை இல்லாத அளவு அதிகரித்து 364 ஆக பதிவாகி உள்ளது. தொடர்ந்து 4-ஆவது நாளாக 300க்கும் மேற்பட்ட இறப்புகள் பதிவாகியிருக்கிறது. இதையடுத்து தமிழகத்தில் கொரோனாவுக்கு பலியானோர் எண்ணிக்கை 18,369 ஆக அதிகரித்துள்ளது. இணை நோய் இல்லாத 91 பேர் உயிரிழந்துள்ளனர். மாநிலம் முழுவதும் சிகிச்சை பெறுவோர் எண்ணிக்கை 2,42,929 ஆக உயர்ந்துள்ளது.

• தமிழகத்திலேயே அதிகபட்சமாக சென்னையில் ஒரே நாளில் 6,16 பேர் நோய் தொற்றால் பாதிக்கப்பட்டுள்ளனர். எனினும் இங்கு தொற்று எண்ணிக்கை தொடர்ந்து 6-ஆவது நாளாக குறைந்துள்ளது குறிப்பிடத்தக்கது. அதற்கு அடுத்தபடியாக கோவை மாவட்டத்தில் 3,071 பேரும், செங்கல்பட்டு மாவட்டத்தில் 2,229 பேரும், திருவள்ளூர் மாவட்டத்தில் 1,890 பேரும், ஈரோடு மாவட்டத்தில் 1,568 பேரும், திருப்பூரில் 1,561 பேரும் தொற்றுக்கு ஆளாகியுள்ளனர்.
• ஆக்சிஜன், தடுப்பூசிகள் மற்றும் உயிர்காக்கும் மருந்துகளை தமிழ்நாட்டிலேயே உற்பத்தி செய்ய நடவடிக்கை எடுக்க முதல்வர் மு.க.ஸ்டாலின் உத்தரவிட்டுள்ளார்.
• ஒரு காவல் நிலைய எல்லையில் இருந்து வேறு காவல் எல்லைக்கு செல்லக்கூடாது என்ற காவல்துறையின் குழப்பமான கட்டுப்பாட்டால் மிகுந்த அவதிக்குள்ளாகி உள்ளனர் பொதுமக்கள். வழிகாட்டுதல்களை பின்பற்றி நடக்க வேண்டும் கொரோனா தொற்று அதிகமுள்ள சென்னையில் காவல்துறையினர் வாகன தணிக்கையை தீவிரப்படுத்தி வருகின்றனர். இ-பதிவு இல்லாமல் சென்னைக்குள் பிற பகுதிகளுக்கு செல்லக்கூடாது என்பதன் முலம், குறிப்பிட்ட பகுதிக்குள்ளேயே பொதுமக்கள் நடமாட்டத்தை சுருக்கி கண்காணிக்கும் புதிய முறையை அமல்படுத்தியுள்ளனர். இதனால் அவசியமின்றி வெளியே வந்தவர்கள் காவல்துறையினரால் தடுத்து நிறுத்தப்பட்டனர்.
• சென்னையை 348 பிரிவாக பிரித்து அதற்குள்ளேயே சென்று வர இ-பதிவு கட்டாயம் என சென்னை காவல்துறை தெரிவித்துள்ளது. நள்ளிரவு 12 மணிக்கு வெளியிடப்பட்ட இந்தக் கட்டுப்பாடுகளால், மருத்துவ தேவை, அத்தியாவசிய தேவை, தனியார் நிறுவன பணிக்கு செல்பவர்கள், வங்கி பணிக்கு செல்பவர்கள் பலர் மிகுந்த அவதிக்குள்ளாகினர்.
• தமிழகம் முழுவதும் சுமார் 50 ஆயிரம் காவலர்கள், ஊரடங்கு பாதுகாப்பிலும், கண்காணிப்பிலும் சுழற்சி முறையில் ஈடுபட்டுள்ளனர். முதல் அலை தொடங்கி இப்போது வரை சுமார் 8 ஆயிரம் காவலர்கள் கொரோனா தொற்றால் பாதிக்கப்பட்டனர். ஆயினும் முன்களப்பணியாளர்களாக களத்தில் நின்று பாதுகாப்பில் ஈடுபட்டுவருகிறார்கள். இவர்களுக்கு சவால்விடும்வகையில் காலை நேரத்தில் ஏராளமானோர் வாகனங்களில் வெளியே வருவதால் போக்குவரத்து நெரிசல் ஏற்படுகிறது.
• தமிழகத்தில் வியாழக்கிழமை முதல் 18 முதல் 44 வயதினருக்கு தடுப்பூசி போடும் பணியை முதல்வர் மு.க.ஸ்டாலின் தொடங்கிவைக்க உள்ளதாக மருத்துவத் துறை அமைச்சர் மா.சுப்பிரமணியன் தெரிவித்துள்ளார். சென்னையில் செய்தியாளர்களிடம் பேசிய அவர், தனியார் மருத்துவமனையில் போலி ரெம்டெசிவிர் மருந்து செலுத்தப்பட்டதால் மருத்துவர் ஒருவர் உயிரிழந்ததாகவும், மருந்து விற்பனை செய்த சுரேஷ் என்பவர் மீது நடவடிக்கை எடுக்கப்பட்டுள்ளதாகவும் கூறினார். ஆரம்ப சுகாதார நிலையங்களில் தேவையான வசதிகள் மேற்கொள்ளப்பட்டு வருவதாகவும் அவர் தெரிவித்தார்

74 ஆதரவற்ற குழந்தைகளுக்கு கொரோனா:

சென்னை கீழ்ப்பாக்கத்தில் உள்ள பாலவிஹார் மனவளர்ச்சி குன்றியோர் இல்லத்தில் 74 குழந்தைகளுக்கு கொரோனா தொற்று ஏற்பட்டுள்ளது.

சென்னை - கீழ்ப்பாக்கத்தில் உள்ள பாலவிஹார் சிறார் இல்லத்தில் உள்ள குழந்தைகளுக்கு கொரோனா தொற்று ஏற்பட்டுள்ளதை நிர்வாகம் மறைப்பதாக புதிய தலைமுறை அலுவலகத்துக்கு தொலைபேசி மூலம் தகவல் வந்தது. இதைத்தொடர்ந்து செய்தியாளர் குழு களத்தில் இறங்கியது. கீழ்ப்பாக்கத்தில் உள்ள அந்த இல்லத்தில் மன வளர்ச்சி குன்றிய 10 வயதுக்குட்பட்ட சிறுவர், சிறுமியர் உட்பட மொத்தம் 174 பேர் தங்கியுள்ளனர்.

கடந்த 16 ஆம் தேதி சென்னை மாநகராட்சியில் இருந்து கொரோனா பரிசோதனை மேற்கொண்டதில் 74 பேருக்கு "பாசிடிவ்" என்று ரிசல்ட் வந்துள்ளது. பாலவிஹார் இல்ல வளாகத்தில் தமிழ்நாடு திறந்தவெளி பல்கலைக்கழகத்தின் கீழ் சிறப்பு ஆசிரியர் பயிற்சி பள்ளி இயங்கி வருகிறது. இந்த பயிற்சி வகுப்புக்கு வெளியில் இருந்து ஆசிரியர்கள் வந்து சென்ற நிலையில், அவர்கள் மூலம் குழந்தைகளுக்கு தொற்று ஏற்பட்டது தெரியவந்துள்ளது. இதை மறைக்கவே குழந்தைகளுக்கு ஏற்பட்ட தொற்றை நிர்வாகம் மூடி மறைக்க முயன்றுள்ளது.

இதுகுறித்து பாலவிஹார் இல்ல நிர்வாகிகளை தொடர்பு கொண்டு பேச முயற்சித்தபோது அவர்கள் தரப்பில் யாரும் பேச மறுத்துவிட்டனர். இதுபோன்ற சிறார் இல்லம் மற்றும் ஆதரவற்றோர் இல்லங்களில் கொரோனா தொற்று பாதிக்கப்பட்டுள்ளதா என்பதை அரசு கண்காணிக்க வேண்டும் என வலியுறுத்துகின்றனர் குழந்தைகள் உரிமையியல் செயற்பாட்டாளர்கள்.

புதிய தலைமுறை செய்தி எதிரொலியாக, பாதிக்கப்பட்ட குழந்தைகளை தினமும் சுழற்சிமுறையில் மருத்துவர்கள் பரிசோதிக்கவும் அவர்களுக்கு தேவையான சிகிச்சை அளிக்கவும் சென்னை மாநகராட்சி நடவடிக்கை எடுத்துள்ளது. தொற்று இல்லாத குழந்தைகளை பாதுகாப்பான அறைகளில் தங்க வைத்து இருப்பதையும் அதிகாரிகள் உறுதி செய்துள்ளனர்.

• கொரோனா பாதிப்பு அதிகம் இருக்கக்கூடிய தமிழ்நாடு, கர்நாடகா, கோவா உள்ளிட்ட 9 மாநில முதல்வர்கள் மற்றும் 46 மாவட்ட அதிகாரிகளுடன் பிரதமர் நரேந்திர மோடி ஆலோசனை நடத்தினார். கூட்டத்தில் பேசிய பிரதமர் மோடி, தீவிரமான பரிசோதனை மற்றும் மக்களுக்கு முழுமையான தகவல்களை வழங்குவது போன்றவை தான் வைரஸுக்கு எதிரான நமது வலுவான ஆயுதம் என்று கூறினார். பரிசோதனை, நோய் கண்டறிதல், சிகிச்சை என்பதை தொடர்ச்சியாக கடைபிடிக்க வேண்டும் எனக் குறிப்பிட்ட பிரதமர், கொரோனா இரண்டாவது அலை தொடர்பாக ஊரக பகுதிகளில் கூடுதல் கவனம் வேண்டும் என அறிவுறுத்தினார். தடுப்பூசி தான் கொரோனாவுக்கு எதிரான சக்தி மிகுந்த ஆயுதம், எனவே தடுப்பூசி தொடர்பான தவறான மாயையை களைந்திட அனைவரும் ஒன்றுபட வேண்டும் எனவும் பிரதமர் கேட்டுக் கொண்டார்.
• முதல்வரின் பொது நிவாரண நிதிக்கு பெறப்படும் நிதி விவரங்கள் மற்றும் செலவு கணக்குகள் பொதுவெளியில் வெளியிடப்படும் என முதல்வர் மு.க.ஸ்டாலின் அறிவித்திருந்தார். அவரது அறிவிப்பின் படி பல்வேறு தரப்பினரிடம் இருந்து பெறப்படும் நிதிக்கு ரசீது மட்டுமல்லாது தமிழக அரசின் இணையதளமான ereceipt.tn.gov.in ல் உடனுக்குடன் பதிவேற்றம் செய்யப்படுகிறது. அதன்படி மே மாதத்தில் தற்போது வரை 17 ஆயிரத்திற்கும் அதிகமானோர் தங்களால் இயன்ற நிதியுதவியை வழங்கியுள்ளனர். அதில் கடந்த 8ஆம் தேதியில் இருந்து 17 ஆம் தேதி வரையில் 69 கோடி ரூபாய் நிதி வந்துள்ளது. இணையவழியில் 29.44 கோடி ரூபாயும், நேரில் 39.56 கோடி ரூபாயும் வழங்கப்பட்டுள்ளது.
• முதல்வரின் நிவாரண நிதிக்கு வழங்கப்பட்ட தொகையில், 25 கோடி ரூபாய் ரெம்டெசிவிர் மற்றும் உயிர்காக்கும் மருந்துகள் வாங்கவும், மற்ற மாநிலங்களில் இருந்து ஆக்சிஜனை கொண்டு வருவதற்காக 25 கோடி ரூபாயும் இதுவரை ஒதுக்கீடு செய்துள்ளது. கொரோனா போன்ற பேரிடர் காலத்தில் பெறப்படும் இது போன்ற நன்கொடை, கொரோனா நிவாரணத்துக்கு மட்டுமே பயன்படும் என்ற உறுதியை வழங்கியுள்ள தமிழக அரசு, முதலமைச்சர் பொது நிவாரண நிதிக்கு வழங்கப்படும் நன்கொடைகளுக்கு 100 சதவிகிதம் வரிவிலக்கு அளிக்கப்படும் எனவும் தெரிவிக்கப்பட்டுள்ளது.
• தமிழகத்தில் கொரோனா 2-வது அலை வேகமாக பரவி வரும் நிலையில், மே 2-வது வாரத்தில் புறநகர் மற்றும் கிராமப்பகுதிகளில் தொற்றின் வேகம் அதிகரித்துள்ளது.
• நெல்லையில் பல ஆண்டுகளாக செயல்படாமல் இருந்த மருத்துவமனையில் 175 ஆக்சிஜன் படுக்கைகள் போர்க்கால அடிப்படையில் பயன்பாட்டுக்கு கொண்டுவரப்பட்டுள்ளன.
• கொரோனா பரிசோதனையை அதிகப்படுத்தி உயிரிழப்பை கட்டுப்படுத்த வேண்டும் என தமிழக அரசை முன்னாள் அமைச்சர் ஜெயக்குமார் வலியுறுத்தியுள்ளார். கொரோனா தடுப்பு நடவடிக்கைகளுக்கு முதலமைச்சர் பொது நிவாரண நிதிக்கு அதிமுக சார்பில் அறிவிக்கப்பட்ட ஒரு கோடி ரூபாய்க்கான காசோலையை தலைமைச் செயலாளர் வெ.இறையன்புவிடம், ஜெயக்குமார் நேரில் வழங்கினார். பின்னர் செய்தியாளர்களிடம் பேசிய அவர், தமிழக அரசு செயலில் ஈடுபட வேண்டும் என கூறினார்.
• டெல்லியில் கொரோனாவால் இறந்தவர்களின் குடும்பத்தினருக்கு 50 ஆயிரம் ரூபாய் நிவாரணம் வழங்கப்படும் என அம்மாநில முதலமைச்சர் அரவிந்த் கெஜ்ரிவால் தெரிவித்துள்ளார்.
• கொரோனா வைரஸ் தொற்று பாதித்து வீட்டுத் தனிமையில் இருப்பவர்கள் மற்றும் அவர்களது குடும்பத்தினர் வெளியே வருவது கண்டறியப்பட்டால் 2 ஆயிரம் ரூபாய் அபராதம் வசூலிக்கப்படும் என்று சென்னை மாநகராட்சி ஆணையர் ககன்தீப் சிங் பேடி எச்சரித்துள்ளார்.
• தமிழகத்தில் புதிதாக நடைமுறைக்கு வந்துள்ள 2 லட்சம் அரிசி அட்டைதாரர்களுக்கும் இரண்டாயிரம் ரூபாய் நிவாரணம் வழங்குவதற்கு முதலமைச்சர் மு.க.ஸ்டாலின் உத்தரவிட்டுள்ளார்.
• காஞ்சிபுரத்தைச் சேர்ந்த முதியவர் ஒருவர், தனது 45 ஆண்டுகால சேமிப்புத் தொகையான ஒரு லட்சம் ரூபாயை கொரோனா நிதியாக வழங்கியிருப்பது நெகிழ்ச்சியை ஏற்படுத்தி உள்ளது. சிவஞானம் என்ற அந்த முதியவர், காஞ்சிபுரம் ஆட்சியர் மகேஸ்வரியை நேரில் சந்தித்து தொகையை அளித்தார். இதேபோல், இந்திய மருத்துவ முறையில் சிகிச்சை அளித்துவரும் கண்ணப்பர் என்ற முதியவரும் தனது சேமிப்புத் தொகையிலிருந்து ஒரு லட்சம் ரூபாயை, கொரோனா நிதியாக, மாவட்ட ஆட்சியர் மகேஸ்வரியிடம் நேரில் வழங்கினார். முதுமையிலும் நிதி உதவி அளித்த அவர்கள் இருவரையும் ஆட்சியர் பாராட்டினார்.
• மதுரை விமான நிலையத்திலிருந்து இந்திய விமானப்படை விமானம் மூலம் ராஞ்சிக்கு 5 காலி ஆக்சிஜன் டேங்கர்கள் கொண்டு செல்லப்பட்டன. ஆக்சிஜன் தட்டுப்பாட்டை சரி செய்ய வெளிமாநிலங்களில் இருந்து ஆக்சிஜன் கொண்டுவர ஏதுவாக பெல் நிறுவனம் 16ஆயிரம் லிட்டர் கொள்ளளவு கொண்ட 5 ஆக்சிஜன் கொள்கலன்களை தயாரித்துள்ளது. அவை லாரி மூலம் திருச்சியிலிருந்து மதுரை விமான நிலையம் கொண்டு செல்லப்பட்டது. அங்கிருந்து விமானம் மூலம் ராஞ்சிக்கு ஆக்சிஜன் கொள்கலன்கள் கொண்டு செல்லப்பட்டன.
• கொரோனாவை வென்ற பல உலக நாடுகளிலும், தற்போது குழந்தைகளுக்கு தொற்று பரவல் அதிகரித்துள்ளது. இதனால் மூன்றாவது அலையின் போது, இந்தியாவிலும் குழந்தைகள் கொரோனாவால் அதிகம் பாதிக்கப்படக்கூடும் என்பதால், விரைவில் முன்னெச்சரிக்கை நடவடிக்கைகளை எடுக்க உலக நாடுகள் எச்சரித்துள்ளன.