உயர்நீதிமன்ற மதுரைக்கிளையில் வழக்கு தொடர்பான விவரங்களை தமிழில் வழங்க வேண்டுமென மாநில தகவல் ஆணையத்தின் ஆணையர் பிறப்பித்த உத்தரவுக்கு தடை கோரி வழக்கொன்று தொடரப்பட்டிருந்தது. அதற்கு இடைக்கால தடை விதித்து உயர்நீதிமன்ற மதுரைக்கிளை உத்தரவு பிறப்பித்திருக்கிறது.
`உயர்நீதிமன்றத்தின் அலுவல் மொழியாக ஆங்கிலம் தான் உள்ளது. எனவே ஆங்கிலத்தில் தான் நீதிமன்ற தகவல்களை கொடுக்க முடியும்’ என்று மதுரை உயர்நீதிமன்ற தரப்பு வழக்கறிஞர் விளக்கம் கூறியுள்ளார்.
திருச்சியைச் சேர்ந்த கணேசன் என்ற நபர், ஒரு வழக்கு தொடர்பான விபரத்தை தகவல் அறியும் சட்டத்தின் கீழ் உயர்நீதிமன்ற மதுரைக்கிளையில் கேட்டிருந்தார். இதற்கான பதில் ஆங்கிலத்தில் அளிக்கப்பட்டது. தமிழ் மொழியில் விபரத்தை தரக்கோரி மாநில தகவல் ஆணையத்தில் மேல்முறையீட்டு மனுத் செய்தார். அந்த மனுவை விசாரித்த மாநில தகவல் ஆணையத்தின் ஆணையர், அவர் கோரிய விபரத்தை தமிழில் கொடுக்க வேண்டுமென உத்தரவிட்டார். இந்த உத்தரவை எதிர்த்து உயர்நீதிமன்ற மதுரைக்கிளை பதிவாளர் (நிர்வாகம்) மற்றும் பொது தகவல் அலுவலர் தரப்பில் உயர்நீதிமன்ற மதுரைக்கிளையில் மனு செய்யப்பட்டது.
அந்த மனு நீதிபதி பரேஷ் உபாத்யாய், கிருஷ்ணன் ராமசாமி அமர்வு முன்பு விசாரணைக்கு வந்தது. உயர்நீதிமன்றம் தரப்பில், `உயர்நீதிமன்றத்தின் அலுவல் மொழியாக ஆங்கிலம் தான் உள்ளது. எனவே, ஆங்கிலத்தில் தான் தகவல் கொடுக்க முடியும்’ என வாதிடப்பட்டது. இதையடுத்து நீதிபதிகள், தமிழில் விபரத்தை கொடுக்க வேண்டுமென்ற மாநில தகவல் ஆணையரின் உத்தரவுக்கு இடைக்கால தடை விதித்த நீதிபதிகள், மனு மீதான விசாரணையை ஏப். 28க்கு தள்ளி வைத்தனர்.
