தூத்துக்குடி வ.உ.சி துறைமுகத்தில் பல்வேறு நாடுகளிலிருந்து சரக்கு பெட்டிகள் மூலம் உரம், நிலக்கரி, சீனி உள்ளிட்ட பொருட்களை ஏற்றுமதி மற்றும் இறக்குமதி செய்யும் பணி நடைபெற்று வருகிறது.
இந்நிலையில் நேற்று முன்தினம் தூத்துக்குடி துறைமுகத்திற்கு எகிப்து நாட்டிலிருந்து ஜென்.கோ பிடியேட்டர் என்ற சரக்கு கப்பல் 55,000 டன் உரத்தை ஏற்றி வந்துள்ளது. இந்தக் கப்பலுக்கு நேற்று காலை துறைமுகம் உள்ளே நுழைய அனுமதி அளிக்கப்பட்டது. துறைமுக நுழைவு வாயில் வழியாக உள்ளே செல்லும் போது கடலில் ஆழம் குறைவான பகுதிக்குக் கப்பல் சென்றதால் கப்பல் தரைதட்டி நின்றுள்ளது.
இதைத்தொடர்ந்து இழுவை கப்பல் மூலம் துறைமுக ஊழியர்கள் தரை தட்டிய கப்பலை மீட்கும் பணியில் தீவிரமாக ஈடுபட்டு வருகின்றனர். இதனால் உரம் இறக்குமதி செய்யும் பணி முழுவதுமாக பாதிக்கப்பட்டுள்ளது.
தூத்துக்குடி துறைமுகத்தில் உரம் ஏற்றி வந்த கப்பல் தரைதட்டி நின்ற சம்பவம் பரபரப்பை ஏற்படுத்தியுள்ளது.
