தமிழ்நாடு ஹோட்டல் உரிமையாளர்கள் சங்கத் தலைவரான தொழிலதிபர் சீனிவாசன், மத்திய நிதியமைச்சர் நிர்மலா சீதாராமன் மற்றும் பாஜக எம்எல்ஏ வானதி ஆகியோரை சந்தித்து பேசிய வீடியோ வெளியாகியுள்ளது.
அந்த வீடியோவை சமூக வலைதளங்களில் பகிர்ந்துள்ள பலரும், ‘அமைச்சர் நிர்மலா சீதாராமனிடம் தொழிலதிபர் சீனிவாசன், எழுந்து நின்று ஏன் மன்னிப்பு கேட்டுள்ளார்? அந்தளவுக்கு அவர் என்ன தவறு செய்தார்? கேள்வி கேட்டால், நிலைமையை சொன்னால் குற்றமா என்ன?’ எனக்கூறி கருத்துக்களை பதிவிட்டு வருகின்றனர்.
தொடர்ந்து இந்த வீடியோ சர்ச்சையை ஏற்படுத்தி வருகிறது. வைரலாகும் காட்சிப்பதிவில் ஆடியோ சரியாக கேட்கவில்லை என்றபோதும் ‘மன்னிச்சிடுங்க தயவுசெய்து, நான் எந்த Party-யிலும் இல்லை’ என சீனிவாசன் இறுதியில் சொல்வது தெரிகிறது. இவ்விவகாரம் குறித்து சம்பந்தப்பட்ட தொழிலதிபர் சீனிவாசனை தொடர்புகொண்டு நாம் கேட்டபோது, அவர் கருத்துக் கூற மறுத்துவிட்டார். நிர்மலா சீதாராமனை கேள்வி கேட்டதற்காக சீனிவாசனுக்கு மன்னிப்பு கேட்க கோரி அழுத்தம் தரப்பட்டதாக திமுக-வினர் விமர்சித்து வருகின்றனர்.
முன்னதாக கோவையில் மத்திய நிதியமைச்சர் நிர்மலா சீதாராமன் கலந்துகொண்டு பேசிய கலந்துரையாடல் கூட்டத்தில், உணவுகளுக்கு தனித்தனி ஜிஎஸ்டி இருப்பதால் ஏற்படும் பிரச்னைகள் குறித்து தொழிலதிபர் சீனிவாசன் சுட்டிக்காட்டினார். அப்போது, பாஜக எம்எல்ஏ வானதி சீனிவாசன் உணவகத்துக்கு வரும்போதெல்லாம் சண்டையிடுவதாகவும் தெரிவித்து இருந்தார். அந்த வீடியோ வைரலான நிலையில், அவர் ஜனரஞ்சகமாக பேசியதாகவும், தவறு ஏதும் இல்லை எனவும் நிர்மலா சீதாராமன் கூறியிருந்தார்.
