ஜல்லிக்கட்டில் பங்கேற்கும் மாடுபிடி வீரர்களுக்கான முன்பதிவு வருகிற 9ஆம் தேதியும், காளைகளுக்கான முன்பதிவு 11ஆம் தேதியும் நடைபெறும் என அறிவிக்கப்பட்டுள்ளது.
தைப்பொங்கலை முன்னிட்டு மதுரை மாவட்டம் அவனியாபுரத்தில் வருகிற 14ஆம் தேதியும், பாலமேட்டில் 15 ஆம் தேதியும், அலங்காநல்லூரில் 16ஆம் தேதியும் ஜல்லிக்கட்டு நடைபெறுகின்றன. இதுதொடர்பாக அறிக்கை ஒன்றை வெளியிட்டிருக்கும் மதுரை மாவட்ட ஆட்சியர் அன்பழகன், முன்பதிவில் கலந்து கொள்ளும் மாடுபிடி வீரர்கள் மற்றும் காளை உரிமையாளர்கள், உதவியாளர்கள் தங்களது மூன்று புகைப்படம் மற்றும் ஆதார் நகல்களை கட்டாயம் கொண்டுவர வேண்டும் என அறிவுறுத்தி உள்ளார். அவனியாபுரம் ஜல்லிக்கட்டில் பங்கேற்கும் மாடுபிடி வீரர்களுக்கு வரும் 10 மற்றும் 11-ம் தேதிகளில் கொரோனோ பரிசோதனை நடைபெறும். பாலமேடு ஜல்லிக்கட்டில் பங்கேற்கும் மாடுபிடி வீரர்களுக்கு 11 மற்றும் 12-ம் தேதிகளில் கொரோனோ பரிசோதனை முகாம் நடைபெறும். அலங்காநல்லூர் ஜல்லிக்கட்டில் பங்கேற்கும் மாடுபிடி வீரர்களுக்கு வரும் 12 மற்றும் 13-ம் தேதிகளில் கொரோனோ பரிசோதனை நடைபெறும் என்று மாவட்ட ஆட்சியரின் அறிக்கையில் குறிப்பிடப்பட்டுள்ளது.
