தமிழக வெற்றிக் கழகத்தின் மாநாடு கலைநிகழ்ச்சிகளுடன் தொடங்கியுள்ளது, தவெக தலைவர் விஜய்யின் தந்தை எஸ்.ஏ. சந்திரசேகர், தாயார் ஷோபா ஆகியோரும் மாநாட்டில் பங்கேற்றுள்ளனர். மாநாட்டுக்கு பல்வேறு அரசியல் கட்சிகளின் தலைவர்களும், திரையுலகினரும் வாழ்த்து தெரிவித்துள்ளனர்.
தமிழக வெற்றிக் கழகத்தின் கொள்கைகள், மாநாட்டின் செயல்திட்டம், தீர்மானங்கள் என்னவாக இருக்கப்போகின்றன என்ற கேள்விகள் பெரிதாக எழுந்துள்ளன. இந்நிலையில்தான் தமிழக வெற்றிக் கழகத்தின் மாநாட்டில் 19 தீர்மானங்கள் நிறைவேற்றப்பட உள்ளதாக தகவல் வெளியானது.
இதில் முக்கியமாக ஒரே நாடு ஒரே தேர்தல், நீட் தேர்வு தொடர்பான தீர்மானங்களும் நிறைவேற்றப்பட இருப்பதாக தகவல் வெளியானது. அதோடு மகளிர் பாதுகாப்பு, மின் கட்டண உயர்வு உள்ளிட்ட விவகாரங்கள் குறித்தும் தீர்மானம் நிறைவேற்றப்பட இருப்பதாக தகவல்கள் வெளியாகின.
இந்நிலையில்தான் தமிழக வெற்றிக் கழகத்தின் செயல்திட்டத்தில் இருமொழிக்கொள்கை இடம்பெற்றுள்ளதாக தகவல் வெளியாகியுள்ளது. தமிழில் பயின்றவர்களுக்கு வேலை வாய்ப்பில் முக்கியத்துவம் உள்ளிட்டவையும் செயல் திட்டத்தில் உள்ளதாக தகவல் வெளியாகியுள்ளது.
