95% மேனிலைப் பள்ளி ஆசிரியர்கள் மற்றும் 70% தொடக்கப்பள்ளி ஆசிரியர்கள் பள்ளிக்கு திரும்பியுள்ளனர் என்று பள்ளிக் கல்வித்துறை இயக்குநர் தெரிவித்துள்ளார்.
பழைய ஓய்வூதிய திட்டத்தை அமல்படுத்த வேண்டும், ஊதிய முரண்பாடுகளை களைய வேண்டும் உள்ளிட்ட 9 அம்ச கோரிக்கைகளை வலியுறுத்தி, ஜாக்டோ ஜியோ அமைப்பினர் தமிழகம் முழுவதும் கடந்த 22-ம் தேதி முதல் காலவரையற்ற வேலைநிறுத்த போராட்டம் நடத்தி வருகின்றனர். இவர்களுக்கு பல்வேறு சங்கத்தைச் சேர்ந்தவர்களும் ஆதரவளித்து போராட்டங்களை நடத்தி வருகின்றனர். இந்த சூழலில், ஜாக்டோ - ஜியோ போராட்டத்தில் பங்கேற்றுள்ள ஆசிரியர்கள் (இன்று) காலை 9 மணிக்குள் பணிக்கு வரவில்லை என்றால், அந்த இடங்கள் காலிப்பணியிடங்களாக அறிவிக்கப்படும் என பள்ளிக்கல்வித்துறை அறிவித்திருந்தது.
இந்நிலையில் தமிழகம் முழுவதும் 95% மேனிலைப் பள்ளி ஆசிரியர்களும் 70% தொடக்கப்பள்ளி ஆசிரியர்களும் பள்ளிக்கு திரும்பியுள்ளனர் என்று பள்ளிக் கல்வித்துறை இயக்குநர் தெரிவித்துள்ளார். மேலும் காலியிடங்களுக்கு தற்காலிக ஆசிரியர்களை நியமிக்க நடவடிக்கை எடுக்க அனைத்து முதன்மைக் கல்வி அலுவலர்கள், மாவட்டக் கல்வி அலுவர்களுக்கு அறிவுறுத்தப்பட்டுள்ளது. அதனால் பள்ளிக்கு அருகில் உள்ள தகுதியானவர்களை தற்காலிக ஆசிரியர்களாக நியமிக்க முதன்மைக் கல்வி அலுவலர்கள் நடவடிக்கை எடுத்து வருகின்றனர்.
