ராசிபுரம் அருகே ஒரே குடும்பத்தின் 4 தலைமுறையை சேர்ந்த 200க்கும் மேற்பட்டோர் ஒன்றிணைந்த நெகிழ்ச்சியான சம்பவம் நடைபெற்றது.
நாமக்கல் மாவட்டம் ராசிபுரம் அருகேயுள்ள தொ.ஜேடர்பாளையத்தை சேர்ந்தவர் முத்து நல்லியப்பன். ஓய்வு பெற்ற காவல்துறை அதிகாரியான இவர் , தன்னுடைய மூதாதையர்களை பற்றி அறிந்துகொள்ள ஆர்வம்கொண்டார். அதற்காகவே ஒரு அறக்கட்டளை உருவாக்கி, அதில் ஏழு தலைமுறைகளை சேர்ந்தவர்களை ஒருங்கிணைத்து விழா நடத்தவும் முடிவுசெய்தார். அதற்கான முழுவீச்சில் ஈடுபட்டு, 1824ம் ஆண்டு முதல் 2019 வரையிலான அனைத்து உறவினர்களையும் கண்டறிந்து விழாவிற்கு அழைத்தார்.
திட்டமிட்ட படியே இன்று விழாவும் நடந்தது. இந்நிகழ்ச்சியில் அவருடைய உறவினர்கள் மற்றும் நண்பர்கள் என 200க்கும் மேற்பட்டோர் கலந்துகொண்டனர். மேலும் இந்த விழாவில் பாட்டன், தாத்தா, மகன், பேரன் என நான்கு தலைமுறையினர் கலந்துகொண்டு ஒருவருக்கொருவர் தங்களின் அன்பினை பகிர்ந்துகொண்டனர். ஒரே குடும்பத்தில் இத்தனை சொந்தங்களாக என அவர்கள் பாசத்தால் உருகியது நெகிழ்ச்சியை ஏற்படுத்தியது. பழைய உறவு முறைகளை தெரிந்து கொள்ள இது வாய்ப்பாக இருந்ததாக விழாவில் கலந்துகொண்டவர்கள் கூறினர்.
