ரோகித் சர்மா தலைமையிலான இந்திய அணி, சமீபத்திய டி20 உலகக்கோப்பையை மீண்டும் வென்று சாதனை படைத்தது. இதைத் தொடர்ந்து டி20 கிரிக்கெட்டில் இருந்து விராட் கோலி, ரோகித் சர்மா, ரவீந்திர ஜடேஜா ஆகிய சீனியர் வீரர்கள் ஓய்வுபெறுவதாக அறிவித்தனர்.
அதேசமயம், ”ஒருநாள் மற்றும் டெஸ்ட் கிரிக்கெட்டில் தொடர்ந்து விளையாடுவோம்” எனவும் அவர்கள் தெரிவித்தனர். இதற்கிடையே இளம்வீரர்கள் கொண்ட இந்திய அணியே , சிறிய அணிகளுக்கு எதிரான ஒருநாள் தொடர்களில் இருந்தும் வெற்றிபெற்றுவிடும் என்ற நம்பிக்கையில் அத்தொடர்களில் இருந்து ஓய்வு எடுத்துக்கொண்டு, தங்கள் குடும்பத்தினருடன் நேரத்தை செலவிட முயன்றனர்.
இதற்காக, இலங்கை அணிக்கு எதிரான ஒருநாள் தொடரில் இருந்தும் அவர்கள் விலக்கு கேட்டு இருந்தனர். ஆனால், அதற்கு கவுதம் கம்பீர் முட்டுக்கட்டை போட்டார். அதன் காரணமாகவே, விடுமுறையில் இருந்த அவர்கள், தற்போது இலங்கை தொடருக்கான அணியில் தேர்வு செய்யப்பட்டு உள்ளனர். அதேசமயம், பும்ரா போன்ற வேகப் பந்துவீச்சாளர்களுக்கு மட்டும் அணியில் ஓய்வு அளிக்கப்படும் எனவும் கூறி இருக்கிறார்.
இதுகுறித்து செய்தியாளர்களிடம் பேசிய அவர், ”இந்திய அணியில் பும்ரா போன்ற முக்கிய வேகப் பந்துவீச்சாளருக்கு நாங்கள் நிச்சயம் ஓய்வு அளிப்போம். அவர்களுக்கு அடிக்கடி காயம் ஏற்படும் என்பதால் அவர்களது உடற்தகுதியை நாங்கள் கருத்தில்கொள்வோம். பும்ரா மட்டுமல்ல, மற்ற வேகப் பந்துவீச்சாளர்களுக்கும் அவர்களது பணிச்சுமைக்கு ஏற்ப ஓய்வு அளிக்கப்படும்.
ஆனால், பேட்ஸ்மேன்கள் நன்றாக விளையாடும்போது அவர்களுக்கு ஓய்வு அளிக்கப்பட வேண்டிய அவசியம் இல்லை. எனவே, பேட்ஸ்மேன்கள் இனி அனைத்து தொடர்களிலும் பங்கேற்பார்கள். ரோகித் சர்மா மற்றும் விராட் கோலி சர்வதேச டி20 போட்டியில் ஓய்வு பெற்றுவிட்டதால் இனி அவர்கள் இந்தியா ஆடும் அனைத்து ஒருநாள் மற்றும் டெஸ்ட் தொடர்களில் பங்கேற்பார்கள்.
விராட் மற்றும் ரோகித்திடம் இன்னும் நிறைய கிரிக்கெட் மீதம் உள்ளது. அவர்கள் சர்வதேச தரத்திலான வீரர்கள். எந்த ஒரு அணியிலும் அவர்கள் இருவரையும் நாம் ஆட வைக்கலாம். அடுத்து சாம்பியன்ஸ் டிராபி, ஆஸ்திரேலியா டெஸ்ட் தொடர் ஆகியவை உள்ளன. அதன்பின்பு அவர்கள் உடற்தகுதியுடன் இருந்தால், 2027 ஒருநாள் போட்டி உலகக் கோப்பையிலும் பங்கேற்பார்கள்" எனத் தெரிவித்துள்ளார். இதன்மூலம் அவர் ரோகித் சர்மா மற்றும் விராட் கோலியை அணியைவிட்டு நீக்கும் எண்ணத்தில் இல்லை என்பதையும் மறைமுகமாக சுட்டிக் காட்டி இருக்கிறார்.
அதேசமயம், அவர்கள் தங்கள் விருப்பத்திற்கு ஏற்ப இனி ஓய்வு எடுக்க முடியாது. இந்தியா ஆடும் அனைத்து தொடர்களிலும் அவர்கள் பங்கேற்றே ஆக வேண்டிய கட்டாயத்தில் உள்ளனர். இதனால் அவர்களின் எதிர்கால கிரிக்கெட்டில் சிக்கல் விழும் என அதன் வல்லுநர்கள் தெரிவித்துள்ளனர்.
