காமன்வெல்த் மல்யுத்தப் போட்டியில் தங்கம் வென்றார் சுஷில்குமார்

தென் ஆப்ரிக்காவில் நடைபெற்ற காமன்வெல்த் மல்யுத்த போட்டியில் ஒலிம்பிக் பதக்க நாயகன் சுஷில்குமார் தங்கம் வென்றார்.

காமன்வெல்த் மல்யுத்த சாம்பியன்ஷிப் போட்டிகள் தென் ஆப்ரிக்காவில் நேற்று தொடங்கி நடைபெற்று வருகின்றன. இதில் இந்தியா சார்பில் 60 வீரர்கள் பங்கேற்றுள்ளனர். இந்நிலையில் நடைபெற்ற இன்று 74 கிலோ ப்ரீஸ்டைல் பிரிவு இறுதிப்போட்டியில், இந்திய வீரர் சுஷில்குமார் மற்றும் நியூசிலாந்து வீரர் ஆகாஷ் குல்லர் ஆகியோர் மோதினர். இதில் ஆரம்பம் முதலே முன்னிலை பெற்ற சுஷில்குமார், தொடர்ந்து அதிரடியாக விளையாடி 8-0 என்ற கணக்கில் வெற்றி பெற்றார்.

இதையடுத்து சுஷில்குமாருக்கு தங்கப்பதக்கம் வழங்கப்பட்டது. காமல்வெல்த் போட்டியில் சுஷில்குமார் தங்கம் வெல்வது இது ஐந்தாவது முறையாகும். நீண்ட இடைவேளைக்கு பின் சர்வதேச போட்டியில் பங்கேற்ற சுஷில்குமார் தங்கம் வென்றுள்ளதால் அவருக்கு வாழ்த்துக்கள் குவிந்து வருகின்றன. இதுதொடர்பாக ட்விட்டரில் பதிவிட்டுள்ள சுஷில்குமார், “3 வருடங்களுக்கு பிறகு காமல்வெல்த் போட்டியில் தங்கம் வென்றது பெருமையாக உள்ளது. இந்த வெற்றியை நான் எனது குரு மற்றும் எனது நாட்டிற்கு அர்ப்பணிக்கிறேன். ஜெய் ஹிந்த்!” என்று தெரிவித்துள்ளார்.