ஹைதாராபாத் அணிக்கு எதிரான ஐபிஎல் போட்டியில் மும்பை இண்டியன்ஸ் 136 ரன்கள் எடுத்தது.
ஐபிஎல் தொடரில் மும்பை இண்டியன்ஸ், சன்ரைசர்ஸ் ஹைதராபாத் அணிகளுக்கு இடையிலான லீக் போட்டி ஹைதராபாத்தில் இன்று நடைபெற்று வருகிறது. இதில், டாஸ் வென்ற ஹைதராபாத் அணி முதலில் பந்துவீச தீர்மானித்தது.
முதலில் பேட்டிங் செய்த மும்பை அணியில் கேப்டன் ரோகித் சர்மா 11 ரன்னில் ஆட்டமிழந்து மீண்டும் ஏமாற்றினார். அவரைத் தொடர்ந்து சூர்ய குமார் யாதவும் 7 ரன்னில் நடையைக் கட்டினார். தொடர்ச்சியாக விக்கெட் வீழ்ந்தன. டி காக் 19, இஷான் கிஷன் 17, ஹர்திக் பாண்ட்யா 6 என அடுத்தடுத்து விக்கெட் சரிந்தன. 86 ரன்னிற்குள் மும்பை அணி 6 விக்கெட்களை இழந்துவிட்டது.
கடைசி கட்டத்தில் பொல்லார்டு சிக்ஸர் மழை பொழிந்தார். அதனால், மும்பை அணியின் ஸ்கோர் கிடுகிடுவென உயர்ந்தது. இறுதியில், மும்பை இண்டியன்ஸ் அணி 20 ஓவர்கள் முடிவில் 7 விக்கெட் இழப்பிற்கு 136 ரன்கள் எடுத்தது. பொல்லார்டு 26 பந்தில் 4 சிக்ஸர் உட்பட 46 ரன்கள் குவித்து ஆட்டமிழக்காமல் இருந்தார்.
137 ரன்கள் என்ற இலக்கை நோக்கிய ஹைதராபாத் அணியில் பேர்ஸ்டோவ் 16, வார்னர் 15 ரன்னில் அடுத்தடுத்து ஆட்டமிழந்தனர். விஜய் சங்கரும் 5 ரன்னில் நடையை கட்டினார். 7 ஓவர்கள் முடிவில் 43 ரன்களுக்கு 3 விக்கெட்களை இழந்தது ஹைதராபாத் அணி.
