ஆஸ்திரேலிய ஓபன் டென்னிஸ் மகளிர் அரையிறுதி ஆட்டத்தில் செரீனா வில்லியம்ஸ் மற்றும் நவோமி ஒசாகா ஆகியோர் மோதுகின்றனர்.
கிராண்ட் ஸ்லாம் டென்னிஸ் போட்டிகளில் ஒன்றான ஆஸ்திரேலிய ஓபன் டென்னிஸ் போட்டி மெல்பர்ன் நகரில் நடைபெற்று வருகிறது. இதில் மகளிர் ஒற்றையர் பிரிவு காலிறுதி ஆட்டம் ஒன்றில் அமெரிக்காவின் செரீனா வில்லியம்ஸ், 2-ம் நிலை வீராங்கனையான ருமேனியாவைச் சேர்ந்த சிமோனா ஹாலெப்பை எதிர் கொண்டார்.
இதில் செரீனா வில்லியம்ஸ் சிறப்பாக விளையாடினார். இதனால் இரண்டு செட்களையும் 6-3, 6-3 என எளிதாக கைப்பற்றி ஹாலெப்பை வீழ்த்தி செரீனா வில்லியம்ஸ் அரையிறுதிக்கு முன்னேறினார். செரீனாவுக்கு இது 9-வது அரையிறுதியாகும். ஒட்டுமொத்தமாக கிராண்ட்ஸ்லாம் போட்டியில் 40-வது அரையிறுதியாகும்.
மற்றொரு காலிறுதி ஆட்டத்தில் 3-ம் நிலை வீராங்கனையான ஜப்பானின் நவோமி ஒசாகா, தைவான் வீராங்கனை சியேஹ் சு-வெய்யை எதிர்கொண்டார். இதில் நவோமி ஒசாகா 6-2, 6-2 என நேர்செட் கணக்கில் வெற்றி பெற்று அரையிறுதிக்கு முன்னேறினார். இப்போது நடைபெற இருக்கும் அரையிறுதிப் போட்டியில் செரீனா வில்லியம்ஸ் மற்றும் நவோமி ஒசாகா ஆகியோர் மோத இருக்கின்றனர்.
