வெஸ்ட் இண்டீஸ் ஏ அணிக்கு எதிரான போட்டியில், முதல் இன்னிங்ஸில் இந்திய ஏ அணி வீரர் சப்னாஸ் நதீம் 5 விக்கெட் வீழ்த்தினார்.
இந்திய ஏ அணி, வெஸ்ட் இண்டீஸில் சுற்றுப்பயணம் செய்து, அந்த நாட்டு ஏ அணியுடன் ஐந்து ஒரு நாள் போட்டிகளில் பங்கேற்றது. அதிகாரப்பூர்வமற்ற இந்த தொடரை 4-1 என்ற கணக்கில் மணீஷ் பாண்டே தலைமையிலான இந்திய ஏ அணி கைப்பற்றியது. இதையடுத்து இரு அணிகளும் டெஸ்ட் போட்டியில் விளையாடி வருகின்றன.
இந்திய ஏ டெஸ்ட் அணிக்கு, ஹனுமா விஹாரி கேப்டனாக செயல்படுகிறார். முதல் போட்டி ஆண்டிகுவாவில் நேற்று தொடங்கியது. முதலில் பேட்டிங்கில் ஈடுபட்ட வெஸ்ட் இண்டீஸ் ஏ அணி, முதல் இன்னிங்சில் 228 ரன்னுக்கு அனைத்து விக்கெட்டையும் இழந்தது. அதிகப்பட்சமாக அந்த அணியின் கார்ன்வால் 59 ரன்னும் பிளாக்வுட் 53 ரன்னும் எடுத்தனர். இந்திய ஏ அணி தரப்பில் சுழல் பந்துவீச்சாளர் நதீம் 5 விக்கெட்டை வீழ்த்தினார். முகமது சிராஜ், மார்கண்டே தலா 2 விக்கெட்டை சாய்த்தனர்.
பின்னர் தனது முதல் இன்னிங்ஸை தொடங்கிய இந்திய ஏ அணியில், தொடக்க ஆட்டக்காரர்களாக பஞ்சாலும் ஈஸ்வரனும் களமிறங்கினர். ஈஸ்வரன் 28 ரன்னில் ஆட்டமிழக்க, பஞ்சால் 31 ரன்னுடன் சுப்மான் கில் 9 ரன்னுடனும் ஆடி வருகின்றனர். 2 வது நாள் ஆட்டம் இன்று நடக்கிறது.
