ஒரே ஓவரில், ஆறு சிக்சர்ஸ் அடித்து அசத்த ரவீந்திர ஜடேஜா, 69 பந்துகளில் 154 ரன்கள் குவித்தார்.
சவுராஸ்ட்ரா கிரிக்கெட் அசோசியேசன் டி20 கிரிக்கெட் போட்டியை நடத்தி வருகிறது. ராஜ்கோட்டில் நேற்று நடந்த போட்டியில் ஜாம்நகர் அணிக்காக ஆடிய, இந்திய கிரிக்கெட் அணியின் ஆல் ரவுண்டர் ரவீந்திர ஜடேஜா எல்லோரையும் வியக்க வைத்தார். எதிரணியின் பந்துவீச்சை துவம்சம் செய்த ஜடேஜா, ஒரு ஓவரில் 6 சிக்சர்களை விளாசினார். தொடர்ந்து அடித்து ஆடிய அவர், 69 பந்துகளில் 154 ரன்கள் குவித்தார். 19 வது ஓவர் வரை நின்ற அவரால் அணியின் ஸ்கோர், 239 ரன்களாக உயர்ந்தது.
சமீபகாலமாக பேட்டிங்கிலும் அசத்தி வருகிறார் ரவீந்திர ஜடேஜா. ரஞ்சி போட்டியில் இரட்டை சதம் அடித்த அவர், ஏற்கனவே மூன்று முறை முச்சதம் அடித்திருக்கிறார். இருந்தாலும் இந்திய கிரிக்கெட் அணி, அவரை ஒரு நாள் மற்றும் டி20 போட்டியில் ஒதுக்கி வைத்திருப்பதுதான் ஏன் என்று தெரியவில்லை.
ஏற்கனவே யுவராஜ் சிங், சர்வதேச டி20 போட்டியில் இங்கிலாந்துக்கு எதிராக ஒரே ஓவரில் 6 சிக்சர்களை பறக்கவிட்டிருந்தார் என்பது குறிப்பிடத்தக்கது.
