உலகக்கோப்பை கால்பந்து போட்டியில் இன்று இரண்டு நாக் அவுட் சுற்று ஆட்டங்கள் நடைபெறுகின்றன.
உலகக்கோப்பை கால்பந்து போட்டியில் இன்று நடக்கும் முதல் போட்டியில் பிரேசில் அணி, மெக்சிகோ அணியை எதிர்கொள்கிறது. ரஷ்யாவின் சமரா நகரில் நடைபெறும் இந்தப்போட்டி இந்திய நேரப்படி இரவு ஏழரை மணிக்குத் தொடங்குகிறது. இவ்விரு அணிகளும் இதுவரை 40 முறை சர்வதேச போட்டிகளில் விளையாடியுள்ளன. இதில் பிரேசில் அணி 23 முறையும், மெக்சிகோ அணி 10 முறையும் வெற்றி பெற்றுள்ளன. 7 போட்டிகள் சமனில் முடிந்துள்ளளன. ரோஸ்டோவ் மைதானத்தில் நடைபெறும் போட்டியில் பெல்ஜியம் அணி, ஜப்பான் அணியை எதிர்த்து விளையாடுகிறது.
இந்தப்போட்டி இரவு 11.30 மணிக்கு தொடங்குகிறது. இவ்விரு அணிகளும் இதுவரை ஐந்து போட்டிகளில் மோதியுள்ளன. இதில் ஒரு போட்டியில் பெல்ஜியம் அணி வெற்றி பெற்றுள்ளது. ஆச்சர்யமளிக்கும் விதமாக இரண்டு முறை ஜப்பான் வென்றுள்ளது. இரண்டு போட்டிகள் சமனில் முடிந்துள்ளன. ஏற்கெனவே அர்ஜென்டினா, போர்ச்சுகல், ஸ்பெயின், டென்மார்க் போன்ற மிகப் பெரிய அணிகள் போட்டியில் இருந்து வெளியேறிவிட்டது. எனவே, இன்றைய ஆட்டத்தில் பிரேசில் அணி வெற்றிப்பெற வேண்டும் என கால்பந்தாட்ட ரசிகர்கள் ஆர்வமாக காத்திருக்கின்றனர்.
