குரோஷியா - டென்மார்க் அணிகளுக்கு இடையே நேற்று நடைபெற்ற நாக் அவுட் சுற்றுப் போட்டியில், பெனால்ட்டி ஷூட் அவுட் முறையில் 3-2 என்ற கோல் கணக்கில் குரோஷியா வென்று காலிறுதிக்கு தகுதிப் பெற்றது.ரஷ்யாவில் நடைபெற்று வரும் உலக் கோப்பை கால்பந்தாட்டப் போட்டிகளின் நாக் அவுட் சுற்று போட்டிகள் நடைபெற்று வருகிறது.
இந்தச் சுற்றில் 16 அணிகள் மோதுகின்றன. இதில் நேற்று நடந்த முதல் ஆட்டத்தில் ஸ்பெயின் மற்றும் ரஷ்யா அணிகள் மோதின. இதில் பெனால்ட்டி ஷூட் அவுட் முறையில் 4-3 என்ற கோல் கணக்கில் ஸ்பெயின் அணியை வீழ்த்தி ரஷ்ய அணி காலிறுதிக்கு முன்னேறியது. அடுத்ததாக, இரவு 11.30 மணிக்கு நிஸ்னி நவ்கோராட் ஸ்டேடியத்தில் தொடங்கிய மற்றொரு ஆட்டத்தில் குரோஷியா அணி டென்மார்க்குடன் மோதியது.
மிகவும் பரபரப்பாக தொடங்கிய ஆட்டத்தில் முதல் நிமிடத்திலே டென்மார்க் அணியின் மேத்யஸ் ஜோர்ஜென்சன் முதல் கோலை அடித்தார். அதற்கு பதிலடியாக ஆட்டத்தின் 4 நிமிடத்தில் குரோஷியா வீரர் மேரியோ 1 கோல் அடித்து அசத்தினார். அதன்பிறகு முழு நேர ஆட்டத்திலும் இரு அணிகளும் கோல் அடிக்கவில்லை. இதனால் கூடுதல் நேரம் வழங்கப்பட்டது. அதிலும் இரு அணியினராலும் கோல் அடிக்கவில்லை. இதனால் இந்த ஆட்டத்திலும் பெனால்ட்டி ஷூட் அவுட் முறையே பின்பற்றப்பட்டது. அதில் குரோஷியா அணி 3-2 என்ற கோல் கணக்கில் வெற்றிப் பெற்றது.
