இங்கிலாந்து அணிக்கு எதிரான முதலாவது டி20 போட்டியில் இந்திய அணி 8 விக்கெட் வித்தியாசத்தில் தோல்வியை தழுவியது.
இந்தியா - இங்கிலாந்து அணிகளுக்கு இடையே முதல் டி20 போட்டி அகமதாபாத் நரேந்திர மோடி மைதானத்தில் நடைபெற்றது. டாஸ் வென்ற இங்கிலாந்து அணி முதலில் பந்துவீச தீர்மானித்தது. முதலில் பேட்டிங் செய்த இந்திய அணியில் ஷிகர் தவான் 4, கே.எல்.ராகுல் 1 ரன்னில் ஆட்டமிழந்து அதிர்ச்சி அளித்தனர். அடுத்து வந்த கேப்டன் விராட் கோலியும் 5 பந்துகளை சந்தித்து ரன் ஏதும் எடுக்காமல் டக் அவுட் ஆனார்.
டெஸ்ட் தொடரில் அதிரடியாக விளையாடிய ரிஷப் பண்ட் 23 பந்துகளில் 21 ரன்கள் எடுத்து ஆட்டமிழந்தார். ஸ்ரேயாஸ் ஐயர் மட்டும் நிதானமாக விளையாடி 48 பந்துகளில் 67 ரன்கள் எடுத்தார். ஆல் ரவுண்டர் ஹர்திக் பாண்ட்யா 21 பந்துகளில் 19 ரன்கள் எடுத்து நடையை கட்டினார். ஷர்துல் தாகூர் டக் அவுட் ஆக, இறுதியில் வாஷிங்டன் சுந்தர் 3, அக்ஸர் படேல் 7 ரன்களுடன் ஆட்டமிழக்காமல் இருந்தனர். இந்திய அணி 20 ஓவர் முடிவில் 7 விக்கெட் இழப்புக்கு 124 ரன்கள் மட்டுமே எடுத்தது.
இதனையடுத்து, 125 ரன்கள் என்ற இலக்குடன் இங்கிலாந்து அணி விளையாடியது. அந்த அணியில் ஜோஸ் பட்லர், ஜேஸன் ராய் தொடக்க வீரர்களாக களமிறங்கினர். பட்லர் 28 ரன்களில் சாஹல் பந்துவீச்சில் ஆட்டமிழந்த போதும், ஜேஸன் ராய் சிக்ஸர், பவுண்டரிகளாக விளாசித் தள்ளினார். அரைசதம் அடிப்பார் என எதிர்பார்க்கப்பட்ட நிலையில், 49 ரன்களில் வாஷிங்டன் சுந்தர் பந்துவீச்சில் ஆட்டமிழந்தார். இதனால் ஒரு ரன்னில் அவர் அரைசதத்தை கோட்டை விட்டார். இங்கிலாந்து அணி 15.3 ஓவர்களிலேயே 130 ரன்கள் எடுத்து வெற்றியை பதிவு செய்தது. இங்கிலாந்து அணியில் டேவிட் மாலன் 24(20), ஜான்னி பேரிஸ்டோவ் 26(17) ரன்கள் எடுத்து ஆட்டமிழக்காமல் இருந்தனர்.
5 போட்டிகள் கொண்ட டி20 தொடரில் முதல் போட்டியில் இங்கிலாந்து வென்று முன்னிலை பெற்றுள்ளது. இரு அணிகளுக்கு இடையிலான இரண்டாவது டி20 போட்டி மார்ச் 14 ஆம் தேதி இதே அகமதாபாத் நரேந்திர மோடி மைதானத்தில் நடைபெறவுள்ளது.
