தோனிக்கு ஃபேர்வெல் மேட்ச் நடத்த பிசிசிஐ திட்டமிட்டிருப்பதாக தகவல் வெளியாகியுள்ளது.
சர்வதேச கிரிக்கெட் போட்டிகளிலிருந்து ஓய்வு பெறுவதாக தோனி அறிவித்துள்ள நிலையில், கிரிக்கெட் உலகில் பல்வேறு சாதனைகளை படைத்த அவருக்கு ஒரு ஃபேர்வெல் போட்டி நடத்தி விடைபெறச் செய்ய வேண்டும் என்று கிரிக்கெட் வீரர்கள், ரசிகர்கள் தரப்பிலிருந்து குரல்கள் எழுந்தன.
இதுகுறித்து பேசிய பிசிசிஐ மூத்த அதிகாரி ஒருவர், ‘’இப்போதைக்கு சர்வதேச போட்டிகள் எதுவும் இந்திய அணிக்கு இல்லை. ஐபிஎல் தொடருக்கு பின் இதற்கான ஏற்பாடுகளை செய்ய வேண்டும். தோனி இந்திய கிரிக்கெட்டுக்காக மிகப்பெரிய பங்காற்றியிருக்கிறார். மரியாதையுடன் பிரியாவிடை கொடுத்து அனுப்பி வைக்கப்பட வேண்டியவர் தோனி.
அவருக்கான ஃபேர்வெல் போட்டியை ஏற்பாடு செய்ய வேண்டும் என்பதுதான் பிசிசிஐயின் விருப்பம். ஆனால் தோனி வித்தியாசமான வீரர். யாருமே எதிர்பார்த்திராத நேரத்தில் ஓய்வை அறிவித்தார்.
தோனியிடம் ஃபேர்வெல் போட்டி குறித்து பேசவில்லை. ஐபிஎல் போட்டியிபோது அவரிடம் பேசுவோம். அப்படி ஃபேர்வெல் போட்டி நடத்தினால், எந்த ஊரில் ஆட விரும்புகிறார் என்பதை கேட்டுத்தான் முடிவு செய்யப்படும். தோனி ஒப்புக்கொள்ள மறுத்தாலும், அவருக்கான மரியாதை பிசிசிஐ தரப்பில் கொடுக்கப்படும்’’ என்று அவர் தெரிவித்துள்ளார்.
