ஸ்பெயினில் நடைபெற்று வரும் லா லீகா கால்பந்து தொடரில் பார்சிலோனா அணி, தொடர்ந்து 7வது வெற்றியைப் பதிவு செய்துள்ளது.
சொந்த மண்ணில் நடந்த போட்டியில், லாஸ் பால்மாஸ் அணியை எதிர்த்து பார்சிலோனா அணி விளையாடியது. முதல் பாதியில் இரு அணிகளும் கோல் அடிக்கவில்லை. இரண்டாவது பாதி ஆட்டம் தொடங்கிய 4வது நிமிடத்தில் பார்சிலோனா அணி கோல் கணக்கை தொடங்கியது. அதனைத் தொடர்ந்து, 70 மற்றும் 71வது நிமிடங்களில் நட்சத்திர வீரர் லியோனல் மெஸ்ஸி கோல் அடித்து பார்சிலோனா அணியின் வெற்றியை உறுதி செய்தார்.
முடிவில் மூன்றுக்கு - பூஜ்ஜியம் என்ற கோல் கணக்கில் பார்சிலோனா அணி வெற்றி பெற்றது. தனிநாடு கோரிக்கையை வலியுறுத்தி கேட்டலோனியா பகுதியினர் போராட்டத்தில் ஈடுபட்டுள்ளதால், போட்டியைப் பார்க்க ரசிகர்களுக்கு அனுமதி மறுக்கப்பட்டிருந்தது. நடப்பு ஆண்டிற்கான, லா லீகா கால்பந்து தொடரில் இதுவரை விளையாடியுள்ள 7 போட்டிகளிலும் வெற்றியை வசமாக்கியுள்ள பார்சிலோனா அணி, 21 புள்ளிகளுடன் முதலிடத்தில் உள்ளது.
