முன்னாள் ஆல்ரவுண்டர் ஃப்ளின்டாப் உடன் ஒப்பிடுவது மகிழ்ச்சியே என்று இங்கிலாந்தின் பென் ஸ்டோக்ஸ் தெரிவித்துள்ளார்.
லண்டன் ஓவல் மைதானத்தில் நடைபெற்ற தென்னாப்பிரிக்க அணிக்கெதிரான மூன்றாவது டெஸ்ட் போட்டியில் அசத்தல் ஆட்டத்தை வெளிப்படுத்திய பென் ஸ்டோக்ஸ் ஆட்டநாயகனாக அறிவிக்கப்பட்டார். அந்தப் போட்டியின் முதல் இன்னிங்ஸில் 112 ரன்கள் குவித்த ஸ்டோக்ஸ், 3 விக்கெட்டுகளையும் வீழ்த்தி இங்கிலாந்து அணி 239 ரன்கள் வித்தியாசத்தில் வெற்றிபெறக் காரணமாக இருந்தார். போட்டியின் முடிவில் ஸ்டோக்ஸின் ஆட்டம் குறித்துப் பேசிய வேகப்பந்து வீச்சாளர் ஸ்டூவர்ட் பிராட், அவரின் ஆட்டம் ஃப்ளின்டாப்-ஐ நினைவுபடுத்தியதாகக் கூறினார்.
இதுகுறித்து பேசிய ஸ்டோக்ஸ், ஃப்ளின்டாப் போன்ற சிறந்த வீரருடன் என்னை ஒப்பிடுவது மகிழ்ச்சி அளிக்கிறது. அதேநேரம், வேறு யாருடைய சாயலும் இல்லாமல் எனக்கென தனி பாணியை உருவாக்குவதிலேயே அதிக கவனம் செலுத்துவதாக அவர் தெரிவித்தார். இங்கிலாந்து அணிக்கு வெற்றிகளைத் தேடித் தருவதே ஒரே இலக்கு என்றும் ஸ்டோக்ஸ் தெரிவித்தார். இங்கிலாந்து அணிக்காக 79 டெஸ்ட் போட்டிகளில் பங்கேற்றுள்ள ஆண்ட்ரூ ஃப்ளின்டாப், 226 விக்கெட்டுகளுடன் பேட்டிங்கில் 31.77 சராசரியை வைத்துள்ளார். சிறந்த பந்துவீச்சாளராக ஃப்ளின்டாப் அடையாளப்படுத்தப்படும் நிலையில், ஸ்டோக்ஸோ அதிரடி பேட்ஸ்மேனாக அறியப்படுகிறார்.
