போஸ் கொடுப்பதற்கு பதிலாக கொஞ்சம் பேட்டிங்கும் செய்யலாம் என்று இந்திய வீரர் கேதார் ஜாதவை ரோகித் சர்மா கிண்டல் செய்துள்ளார்.
வெஸ்ட் இண்டீஸ் கிரிக்கெட் அணி இந்தியாவில் சுற்றுப்பயணம் மேற்கொண்டுள்ளது. அந்த அணி இந்தியாவுடன் மூன்று டி20 மற்றும் மூன்று ஒருநாள் போட்டி கொண்ட தொடரில் பங்கேற்க உள்ளது. இந்த இரு அணிகள் இடையேயான முதல் டி20 போட்டி இன்று நடைபெறுகிறது. டி20 தொடருக்கு பிறகு ஒருநாள் போட்டி நடைபெறுகிறது. வெஸ்ட் இண்டீஸ் ஒருநாள் தொடருக்கான இந்திய அணியில் கேதார் ஜாதவ் இடம் பெற்றுள்ளார்.
இந்நிலையில் இந்திய வீரர் கேதார் ஜாதவ் ஒருநாள் தொடருக்காக பயிற்சியில் ஈடுபட்டுள்ளார். அவரது பயிற்சி தொடர்பாக ஒரு படத்தை தனது இன்ஸ்டாகிராம் பக்கத்தில் பதிவிட்டுள்ளார். அதில், “களத்தில் மீண்டும் இறங்குவது எனக்கு மிகவும் மகிழ்ச்சி அளிக்கிறது” எனப் பதிவிட்டுள்ளார். இதற்கு இந்திய அணியின் துணை கேப்டன் ரோகித் சர்மா, “புகைப்படத்திற்கு போஸ் கொடுப்பதற்கு பதிலாக கொஞ்சம் பேட்டிங்கும் செய்” என்று கிண்டல் செய்துள்ளார்.
