"கேசினோ" இந்த வார்த்தையை கேள்விப்படாத இளைஞர்களே இல்லை. இது இளைஞர்களை மட்டும் வசியப்படுத்தும் சொல் இல்லை வயதானவர்களையும்தான். தமிழகத்தில் எங்கும் அதிகாரப்பூர்வமான கேசினோக்கள் செயல்படவில்லை. ஆனால், இப்போது புதுச்சேரி அரசாங்கம் கேசினோக்களுக்கு அனுமதி வழங்க தீர்மானித்துள்ளதாக தெரிகிறது. ஆனால், அதற்கு அம்மாநில துணை நிலை ஆளுநர் கிரண் பேடி முதல், சாதாரண மக்கள் வரை பெரும் எதிர்ப்பு கிளம்பியுள்ளது. புதுச்சேரி ஒரு சுற்றுலாத்தலம் என்பதால் கேசினோக்களுக்கு அனுமதி தர அந்த அரசு யோசித்திருக்கலாம். ஆனால், எதிர்ப்புக்கான காரணமும், கேசினோ என்றால் என்ன என்பதையும் தெரிந்துக்கொள்ளலாம்.
மிக முக்கியமாக இதைப் படிப்பவர்கள் ஜேம்ஸ் பாண்ட் "கேசினோ ராயல்" திரைப்படத்தையும் நினைவில் வைத்துகொள்ளலாம். பொது அறை அல்லது கட்டடத்தில் எந்த ஒரு அறிவுப்பூர்வமான விஷயமும் இல்லாமல் பணம் வைத்து விளையாடுவது கேசினோ விளையாட்டாகும். அப்போது இந்தியாவில் கேசினோக்களே இல்லையா என்ற கேள்வி எழலாம்.இந்தியாவில் சில இடங்களைத் தவிரப் பிற இடங்களில் கேசினோ விளையாடத் தடை உள்ளது. இந்தியாவில் பொது இடத்தில் பெட்டிங் அல்லது சூதாட்டம் விளையாடுவது சட்டப்பூர்வமானது இல்லை. பொதுச் சூதாட்ட சட்டத்தின்படி இந்தியாவில் அனைத்து விதமான சூதாட்டத்திற்கும் சட்டப்பூர்வமான தடை இருக்கிறது.
கூடுதல் சூதாட்ட வருமான வரிச் சட்டம் 2000-ம் கீழ் சில மாநிலங்களில் சூதாட்டம் சட்ட ரீதியாகச் செயல்பட்டு வருகிறது. விளையாட்டுப் போட்டிகளுக்குப் பெட் வைத்தல் மற்றும் கேசினோ விளையாடுதல் போன்றவற்றுக்குச் சிக்கிம் அரசு அனுமதி அளிக்கிறது. கோவாவில் சட்டரீதியான கேசினோக்கள் உள்ளன. சிக்கிமில் அதிகாரப்பூர்வமாக 4 கேசினோக்கள் இருப்பதாக கூறப்படுகிறது. ஆனால் சுற்றுலா வாசிகளின் சொர்க்கபுரியான கோவாவில் 10க்கும் மேற்பட்ட கேசினோக்கள் உள்ளன. அதில் 4 கேசினோக்கள் கப்பல்களில் செயல்படுபவனவாகும். தமன் மற்றும் தியூவை பொறுத்தவரையில் 5 நட்சத்திர ஓட்டல்களில் கேசினோ விளையாட்டுக்களை நடத்திக்கொள்ளலாம் என்ற விதி இருக்கிறது.
கேசினோ என்றால் சூதாட்டம் நடைபெறும் இடம். இதற்கு ஏன் எதிர்ப்பு என்றால் ஒரு தனிமனிதன் மிகக் குறுகிய காலத்தில் தனது அனுமானத்தையும் அதிர்ஷ்டத்தையும் மட்டும் நம்பி தம் பணத்தை முதலீடு செய்யும் ஒரு விஷயம். பாகுபாடு இல்லாமல் அனைத்து வகுப்பு, அனைத்து தரப்பு மக்களையும் சூதாட்டத்தின் கவர்ச்சி இழுக்கும். கேசினோக்களில் சூதாட்டத்தில் பணத்தை இழப்பவர்கள் அதிகம் என்பதால் எதிர்ப்பும் இருக்கிறது.
