உயிரிழப்புக்கு வழிவகுக்கும் பாலியல் வன்கொடுமையை செய்யும் குற்றவாளிகளுக்கு மரண தண்டனை விதிக்கும் வரைவு சட்டமசோதா, மேற்குவங்க சட்டப்பேரவையில் இன்று தாக்கல் செய்யப்பட உள்ளது.
இந்த சட்டமசோதாவின்படி, பாலியல் வன்கொடுமை அல்லது கூட்டு பாலியல் வன்கொடுமை செய்யப்பட்டது உறுதிசெய்யப்பட்டால், சம்பந்தப்பட்ட குற்றவாளிகளுக்கு, உயிர் இருக்கும் வரை சிறை தண்டனையை அனுபவிக்கும் விதமாக ஆயுள் தண்டனை விதிக்கப்படும் எனவும் தெரிவிக்கப்பட்டுள்ளது.
மாநிலத்தில் பெண்கள் மற்றும் குழந்தைகளுக்கு பாதுகாப்பான சூழலை ஏற்படுத்தவும், பாலியல் வன்கொடுமை வழக்குகளில் சட்டப்படி கடும் நடவடிக்கை எடுக்கவேண்டும் என்ற நோக்கத்திலும் இந்த வரைவு மசோதா கொண்டுவரப்படுவதாக தெரிவிக்கப்பட்டுள்ளது. அதோடு, பாலியல் வன்கொடுமை வழக்குகளில், முதற்கட்ட விசாரணை அறிக்கை தயாரானதில் இருந்து 21 நாட்களில் விசாரணையை முடிக்க இந்த சட்டமசோதா வழிவகுக்கிறது.
பெண் பயிற்சி மருத்துவர் பாலியல் வன்கொடுமை செய்யப்பட்டு படுகொலை செய்யப்பட்ட சம்பவம், பெரும் அதிர்வலைகளை ஏற்படுத்திய நிலையில், மேற்கு வங்கத்தில் கூட்டப்பட்டுள்ள சிறப்பு கூட்டத்தொடரில், இந்த வரைவு மசோதா இன்று தாக்கல் செய்யப்படுகிறது. இதை மாநில சட்டத்துறை அமைச்சர் மோலோய் கட்டக் (Moloy Ghatak) தாக்கல் செய்ய உள்ளார்.
