மருத்துவர் கொலை வழக்கு சிபிஐக்கு மாற்றம் -பாரா ஒலிம்பிக்கில் பங்கேற்க பிரமோத் பகத்திற்கு தடை!

கொல்கத்தா பெண் மருத்துவர் கொலை வழக்கு விசாரணை சிபிஐ-க்கு மாற்றம் செய்யப்பட்டுள்ளது. மேலும், நீதி கேட்டு நாடு முழுவதும் மருத்துவர்கள் நடத்தும் போராட்டத்தால், மருத்துவ சேவைகள் பாதிப்படைந்துள்ளது.

சுகாதாரத் துறை அமைச்சருடனான பேச்சுவார்த்தைக்கு பின் போராட்டத்தை கைவிடுவதாக் ஒரு மருத்துவர் சங்கம் அறிவிப்பு. மேலும், மருத்துவர்கள் மீதான தாக்குதலை தடுக்க சட்டம் அமல்படுத்தப்படும் வரை போராட்டம் தொடரும் என மற்ற சங்கங்கள் திட்டவட்டம்.

தகுதி நீக்கம் செய்யப்பட்டதற்கு எதிராக இந்திய மல்யுத்த வீராங்கனை வினேஷ் போகட் தொடர்ந்த வழக்கில் மூன்றாவது முறையாக தீர்ப்பை ஒத்திவைத்தது சர்வதேச விளையாட்டு தீர்ப்பாயம்.

44 ஆயிரத்து 125 கோடி ரூபாய் மதிப்பிலான 15 முதலீடுகளுக்கு தமிழக அமைச்சரவைக் கூட்டத்தில் ஒப்புதல் அளிக்கப்பட்டுள்ளது . இதன் மூலம் 24 ஆயிரத்து 700 பேருக்கு வேலைவாய்ப்பு கிடைக்கும் என அமைச்சர் தங்கம் தென்னரசு உறுதியளித்துள்ளார்.

துணைவேந்தர் நியமனம் உள்ளிட்ட பல்வேறு விவகாரத்தில் தமிழக அரசுக்கு ஆளுநர் முட்டுக்கட்டை போடுவதாக குற்றச்சாட்டுகளை முன்வைத்து, சுதந்திர தினத்தையொட்டி நடைபெறும் ஆளுநரின் தேநீர் விருந்தை புறக்கணிப்பதாக திமுக கூட்டணிக் கட்சிகள் அறிவித்துள்ளன.

திருவண்ணாமலை அருகே 10 ரூபாய் குளிர்பானம் குடித்து சிறுமி உயிரிழந்ததாக குற்றச்சாட்டு; தமிழகம் முழுவதும் குளிர்பான ஆலைகளில் உணவு பாதுகாப்புத்துறை அதிகாரிகள் ஆய்வு மேற்கொண்டு வருகின்றனர்.

உச்சநீதிமன்ற உத்தரவுப்படி தமிழகத்திற்கு வழங்க வேண்டிய நீரை திறந்து விட வேண்டும் என கர்நாடக அரசுக்கு காவிரி ஒழுங்காற்றுக்குழு பரிந்துரை செய்துள்ளது.

தமிழகத்தில் துணைவேந்தர்கள் இல்லாமல் செயல்படும் 5 பல்கலைக்கழகங்களில் மாணவர்களின் எதிர்காலம் குறித்து கவலை தெரிவிக்கும் கல்வியாளர்கள்.

செபி தலைவர் மாதபியை பதவியில் இருந்து நீக்க வலியுறுத்தி, வரும் 22-ஆம் தேதி நாடு தழுவிய போராட்டத்தை அறிவித்தது காங்கிரஸ்.

நாட்டின் 78ஆவது சுதந்திர தினத்தை கொண்டாட விரிவான ஏற்பாடுகள் செய்யப்பட்டுள்ளன. அந்தவகையில், கண்ணை கவரும் மின்னொளியில் அரசு கட்டடங்கள் ஜொலிக்கின்றன.

டோக்யோ பாரா ஒலிம்பிக்கில் தங்கம் வென்ற பிரமோத் பகத், ஊக்க மருந்து சோதனை தொடர்பான விதிமுறைகளை மீறியதால் 18 மாதங்களுக்கு பாரிஸ் பாரா ஒலிம்பிக்கில் பங்கேற்க தடைவிதிக்கப்பட்டுள்ளது.