கள்ளக்குறிச்சியில் விஷச்சாராயம் அருந்தி உயிரிழந்தவர்களின் எண்ணிக்கை அதிகரித்த நிலையில் (தற்போதுவரை 49 என சொல்லப்படுகிறது), கள்ளக்குறிச்சி, சேலம், விழுப்புரம், புதுச்சேரி மருத்துவமனைகளில் 100-க்கும் மேற்பட்டோருக்கு சிகிச்சை பெற்றுவருகின்றனர்.
விஷச்சாராயம் குடித்து உயிரிழந்தவர்களில் 21 பேரின் உடல்கள் ஒரே இடத்தில் தகனம். நெஞ்சை உலுக்கும் கோமுகி ஆற்றங்கரை காட்சிகள் அனைவரையும் உறைய வைத்துள்ளது.
விஷச்சாராயம் அருந்தி உயிரிழந்தவர்களின் குடும்பத்தினருக்கு தலா 10 லட்சம் ரூபாய் அறிவிக்கப்பட்ட நிலையில், பாதிக்கப்பட்ட குடும்பங்களைச் சந்தித்து ஆறுதல் கூறி காசோலைகளை வழங்கினார் அமைச்சர் உதயநிதி ஸ்டாலின்.
கள்ளக்குறிச்சியில் விஷச்சாராயத்தால் பாதிக்கப்பட்டவர்களை நேரில் சந்தித்து அரசியல் தலைவர்கள் ஆறுதல் தெரிவித்து வரும் சூழலில், மரணத்திற்கு பொறுப்பேற்று முதலமைச்சர் ஸ்டாலின் பதவி விலக இபிஎஸ் வலியுறுத்தியுள்ளார்.
விஷச்சாராய பாதிப்பால் சிகிச்சை பெற்று வருவோருக்கு தவெக தலைவர் விஜய் நேரில் ஆறுதல் தெரிவித்தார். இந்நிலையில், பாதிக்கப்பட்டோருக்கு தேவையான உதவிகளை செய்ய கட்சி நிர்வாகிகளுக்கு அறிவுறுத்தியுள்ளார்.
கள்ளக்குறிச்சி விஷச்சாராய மரணத்தில் சிபிஐ விசாரணை கோருகிறது அதிமுக. இவ்வழக்கை இன்று விசாரணைக்கு எடுத்துக் கொள்கிறது சென்னை உயர்நீதிமன்றம்.
விக்கிரவாண்டி இடைத்தேர்தல் வேட்புமனு தாக்கலுக்கான கால அவகாசம் இன்றுடன் நிறைவடைகிறது. ஜூலை 10ஆம் தேதி வாக்குப்பதிவு நடைபெறும் நிலையில், தேர்தல் களம் சூடுபிடித்துள்ளது.
நீட் தேர்வுக்கு எதிராக காங்கிரஸ் கட்சி இன்று நாடு தழுவிய போராட்டம் நடத்துகிறது. இந்த போராட்டத்தில், குளறுபடிகளுக்கு தீர்வு காண வலியுறுத்தப்படுகிறது.
மதுபான கொள்கை முறைகேடு வழக்கில் டெல்லி முதலமைச்சர் அர்விந்த் கெஜ்ரிவாலுக்கு பிணை வழங்குவதற்கு எதிராக டெல்லி உயர்நீதிமன்றத்தை நாடுகிறது அமலாக்கத்துறை.
டி20 உலகக்கோப்பை தொடரில் ஆப்கானிஸ்தானை வீழ்த்தியது இந்தியா. சூப்பர் 8 சுற்றில் முதல் வெற்றியை பதிவு செய்து அசத்தல்.
