2, 327 காலிப்பணியிடங்களுக்கான குரூப்-2 தேர்வு, தமிழ்நாடு முழுவதும் 2 ஆயிரத்து 763 மையங்களில் இன்று நடைபெறுகிறது.
தமிழ்நாடு அரசுப்பணியாளர் தேர்வாணையம் நடத்தும் ஒருங்கிணைந்த குடிமைப் பணிகள் தேர்வு குரூப் 2 மற்றும் குரூப் 2ஏ பதவிகளுக்கான முதல் நிலைத்தேர்வு நடைபெறவுள்ளது. இத்தேர்வினை தமிழகம் முழுவதும் 2,763 தேர்வு மையங்களில் 7 லட்சத்து 93 ஆயிரத்து 947 தேர்வர்கள், தேர்வு எழுத உள்ளனர்.
சென்னையில் 251 தேர்வு மையங்களில் தேர்வு நடைபெறுகிறது. உதவி ஆய்வாளர், துணை வணிகவரி அலுவலர், வனவர் உள்பட பல்வேறு குரூப்-2 பதவிகளில் 507 காலிப்பணியிடங்களும், உதவியாளர், கணக்கர், நேர்முக உதவியாளர் உள்பட குரூப்-2ஏ பதவிகளில் ஆயிரத்து 820 காலிப்பணியிடங்களும் என மொத்தம் 2 ஆயிரத்து 327 காலிப்பணியிடங்களுக்கு தேர்வு நடைபெறுகிறது.
தேர்வர்கள் 9 மணிக்கு முன்னரே தேர்வு மையங்களுக்கு வர வேண்டும் என்றும், தாமதமாக வருவோர் தேர்வு மையத்தில் நுழைய அனுமதிக்கப் படமாட்டார்கள் எனவும் டிஎன்பிஎஸ்சி தெரிவித்துள்ளது.
