2020-ஆம் ஆண்டுக்கான மிஸ் இந்தியா பட்டத்தை தெலங்கானா மாநிலத்தைச் சேர்ந்த மானசா வாரணாசி வென்றுள்ளார்.
ஆண்டுதோறும் இந்தியா சார்பில் உலக அழகி போட்டியில் கலந்து கொள்பவர்களைத் தேர்ந்தெடுப்பதற்காக 'மிஸ் இந்தியா' அழகி போட்டிகள் நடத்தப்படும். இதில் வெற்றி பெறுபவர்கள் அந்த ஆண்டு நடைபெறும் உலக அழகி போட்டியில் இந்தியா சார்பில் கலந்து கொள்வார்கள். அந்த வகையில், இந்த ஆண்டு நடைபெற்ற மிஸ் இந்தியா போட்டியில், தெலங்கானா மாநிலத்தைச் சேர்ந்த மானசா வாரணாசி வெற்றியாளராகத் தேர்வு செய்யப்பட்டுள்ளார். இதன்மூலம் அடுத்த ஆண்டு நடைபெற உள்ள உலக அழகி போட்டியில் இவர் இந்தியா சார்பில் கலந்துகொள்ள உள்ளார்.
23 வயதான மானசா, ஹைதராபாத்தில் பிறந்து வளர்ந்தவர் ஆவார். பொறியியல் படிப்பை முடித்த இவர், நிதி தகவல் பரிமாற்ற ஆய்வாளராக பணியாற்றி வருகிறார். மானசாவை அடுத்து ஹரியானாவைச் சேர்ந்த மனிகா சிஷோகந்த் உத்திர பிரதேசத்தைச் சேர்ந்த மன்யா சிங் ஆகிய இருவரும் ரன்னராக தேர்வு செய்யப்பட்டுள்ளனர்.
