'சந்திப்பு குறித்து எந்த தகவலையும் பகிரவில்லை' - மனோகர் பரிக்கருக்கு ராகுல் காந்தி கடிதம்

கோவா முதல்வர் மனோகர் பரிக்கரை சந்தித்தது குறித்து தாம் எந்த தகவலையும் பொதுவெளியில் பகிரவில்லை என காங்கிரஸ் தலைவர் ராகுல் காந்தி விளக்கம் அளித்துள்ளார்.‌ 

ரஃபேல் ஒப்பந்தத்தில் முறைகேடு நடைபெற்றுள்ளதாக காங்கிரஸ் தலைவர் ராகுல்காந்தி தொடர்ந்து குற்றம்சாட்டி வருகிறார். இது தொடர்பான ரகசிய ஆவணங்கள் முன்னாள் பாதுகாப்புத்துறை அமைச்சரான மனோகர் பரிக்கரிடம் இருப்பதாக தெரிவித்து வருகிறார்.

இதைத்தொடர்ந்து காங்கிரஸ் மூத்த தலைவர் சோனியாகாந்தி கோவாவில் ஓய்வு எடுத்து வருகிறார். காங்கிரஸ் தலைவர் ராகுல்காந்தியும் 3 நாள் பயணமாக கோவா சென்றுள்ளார்.

இந்நிலையில், சில நாட்களுக்கு முன்பு பிரதமர் மோடி தலைமையிலான அமைச்சரவையில் முன்னாள் இராணுவ அமைச்சராகவும் தற்போது கோவா முதலமைச்சராகவும் உள்ள மனோகர் பரிக்கரை ராகுல் காந்தி சந்தித்து நலம் விசாரித்தார். 

இதைத்தொடர்ந்து டெல்லியில் நடைபெற்ற கட்சிக் கூட்டத்தில் பேசிய ராகுல்காந்தி ரஃபேல் ஒப்பந்தத்தில் செய்யப்பட்ட திருத்தங்கள் குறித்து பாதுகாப்புத் துறை அமைச்சராக இருந்த தன்னிடம் பிரதமர் மோடி எதுவுமே தெரிவிக்கவில்லை என மனோகர் பரிக்கர் கூறியதாக காங்கிரஸ் தலைவர் ராகுல் காந்தி தெரிவித்தார்.

இதன் மூலம் அனில் அம்பானிக்காக பிரதமர் மோடி செய்த தவறு வெளிச்சத்துக்கு வந்து விட்டதாகவும் ராகுல் தெரிவித்தார்.
இதையடுத்து காங்கிரஸ் தலைவர் ராகுல்காந்திக்கு கோவா முதல்வர் மனோகர் பரிக்கர் 2 பக்க கடிதம் எழுதியுள்ளார். 

அதில், தன்னை சந்தித்த போது ரஃபேல் தொடர்பாக ராகுல்காந்தி எதுவும் பேசவில்லை என்றும் எங்கள் சந்திப்பு வெறும் 5 நிமிடங்கள் தான் நடைபெற்றது எனவும் தெரிவித்திருந்தார்.

உடல்நலம் விசாரிக்கவே தன்னை வந்து சந்தித்தாக கருதினேன் எனவும் சந்திப்பின் பின்னணியில் அரசியல் காரணம் உள்ளதை எண்ணி வருந்துகிறேன் எனவும் மனோகர் பரிக்கர் குறிப்பிட்டிருந்தார். 

உண்மைக்கு மாறான தகவலை மலிவான அரசியல் ஆதாயங்களுக்காக ராகுல் காந்தி கூறியதாகவே தான் கருதுவதாகவும் 
ரஃபேல் விமான ஒப்பந்தம் விதிமுறைப்படி நடந்ததாகவே தான் எப்போதும் கூறி வருவதாகவும் பரிக்கர் கூறியிருந்தார்.

இந்நிலையில், ராகுல்காந்தி மனோகர் பாரிக்கருக்கு பதில் கடிதம் எழுதியுள்ளார். அதில், உடல் நலம் பாதிக்கப்பட்டுள்ள அவரை மரியாதை நிமித்தமாக சந்தித்ததாகவும், அது முழுக்க முழுக்க தனிப்பட்ட முறையிலான சந்திப்பு என்றும் ராகுல் குறிப்பிட்டுள்ளார். சந்திப்புக்கு பின்னர் இரண்டு முறை மக்கள் மத்தியில் பேசியதாகவும், ரஃபேல் தொடர்பாக முன்னர் பரிக்கர் தெரிவித்த கருத்துகளையே அப்போது கூறியதாகவும் ராகுல் விளக்கம் அளித்துள்ளார்.