மத்திய இணை அமைச்சர் எல்.முருகன் நேற்று ஏற்பாடு செய்திருந்த தமிழ் புத்தாண்டு நிகழ்ச்சியில் பிரதமர் மோடி சிறப்பு விருந்தினராக கலந்துகொண்டு உரையாற்றினார். விழாவில் முன்னாள் குடியரசு தலைவர் ராம்நாத் கோவிந்த், தற்போதைய துணை குடியரசுத் தலைவர் ஜகதீப் தங்கர், மத்திய அமைச்சர் அனுராக் சிங் தாகூர், தேசிய மகளிர் அணி தலைவர் வானதி சீனிவாசன், தமிழ் மாநில காங்கிரஸ் கட்சியின் தலைவர் ஜி.கே.வாசன், ராதிகா சரத்குமார் உள்ளிட்டோர் கலந்துகொண்டனர்.
மேலும் பாஜக நிர்வாகிகள், தென்னிந்திய பிரிவின் உறுப்பினர்கள் ஏராளமானோர் கலந்துகொண்டனர். நிகழ்ச்சியில் வேட்டி சட்டை அணிந்து கலந்து கொண்ட பிரதமர், ஏற்பாடு செய்யப்பட்டிருந்த கலைநிகழ்ச்சிகளை கண்டு மகிழ்ந்தார்.
பின்பு உரையாற்றிய பிரதமர், “நான் குஜராத்தில் எம்.எல்.ஏ.வாக இருந்தபோது, தமிழ் வம்சாவளியைச் சேர்ந்த ஏராளமானோர் அங்கு வசித்து வந்தனர். அவர்கள் எனது வாக்காளர்களாக இருந்து என்னை எம்.எல்.ஏ.வாகவும் முதல்வராகவும் ஆக்கினார்கள். அவர்களுடன் நான் செலவிட்ட நேரத்தை என்னால் மறக்கவே முடியாது. தமிழ் பண்பாடும் தமிழ் மக்களும் நித்தியமானவர்கள், உலகமயமானவர்கள்.
உலகின் பழமையான மொழி தமிழ். இதில் ஒவ்வொரு இந்தியரும் பெருமை கொள்கிறோம். தமிழ் இலக்கியமும் உலகில் பலராலும் மதிக்கப்படும் இடத்தில் இருக்கிறது.
மோடி
சென்னையிலிருந்து கலிபோர்னியா வரை, மதுரையில் இருந்து மெல்போர்ன் வரை தங்கள் கலாச்சாரம் மற்றும் பாரம்பரியங்களை தம்முடன் சுமந்து சென்ற தமிழ் மக்களைக் காணலாம்.
தமிழ்த் திரையுலகம் நமக்கு சிறந்த படைப்புகளைத் தந்திருக்கிறது.
சுதந்திரப் போராட்டத்திலும் தமிழ் மக்களின் பங்களிப்பு மிக முக்கியமானது. சுதந்திரத்திற்குப் பிறகு, நாட்டின் மறுசீரமைப்பிலும் தமிழக மக்களின் திறமை நாட்டிற்கு புதிய உயரத்தை அளித்துள்ளது.
ஸ்ரீ ராஜகோபாலாச்சார்யா மற்றும் அவரது தத்துவம் இல்லாமல் நவீன இந்தியா பற்றிய பேச்சு முழுமையடையுமா? மருத்துவம், சட்டம் மற்றும் கல்வித்துறையில் தமிழ் மக்களின் பங்களிப்பு ஈடு இணையற்றது. மனதின் குரல் நிகழ்ச்சியில் தமிழ் மக்களின் பங்களிப்பு குறித்து நான் அதிகம் பேசியுள்ளேன்.
ஒரு நாடாக நமது பாரம்பரியத்தை மேம்படுத்துவது நமது பொறுப்பு. இப்போது நீங்கள் தேசத்திற்கு சேவை செய்ய எனக்கு வாய்ப்பளித்துள்ளீர்கள்
ஐ.நா.வில் நான் தமிழ் மொழியில் மேற்கோள் காட்டியபோது, உலகம் முழுவதிலுமிருந்து மக்கள் தங்கள் மகிழ்ச்சியை வெளிப்படுத்தியது எனக்கு நினைவிருக்கிறது.
யாழ்ப்பாணம் சென்ற இந்தியாவின் முதல் பிரதமர் நான்தான். இலங்கையில் உள்ள தமிழ் சமூகத்தின் நலனுக்காக, அங்குள்ள மக்கள் நீண்ட காலமாக உதவிக்காக காத்திருந்தனர். எமது அரசாங்கம் தமிழ் மக்களுக்கு வீடுகளை கட்டிக்கொடுத்து அவர்களுக்காக பல உதவிகளை செய்தது
சமீபத்தில் நடந்து முடிந்த காசி தமிழ் சங்கமம் மிகப்பெரிய வெற்றி பெற்றது. அந்த நிகழ்ச்சியில், புதுமையையும் பன்முகத்தன்மையையும் ஒன்றாகக் கொண்டாடினோம்.
தமிழ்நாட்டில் இருந்து யாராவது காசிக்கு வரும்போது இந்த நெருக்கம் எளிதில் புலப்படும். மிகவும் வயதான காசி விஸ்வநாதரின் அறங்காவலர் ஒருவர் தமிழகத்தைச் சேர்ந்தவர் என்பது இதுவே முதல் முறை. இது அன்பைப் பிரதிபலிக்கிறது மற்றும் 'ஏக் பாரத் ஷ்ரேஸ்தா பாரத்' என்ற உணர்வை பலப்படுத்துகிறது” என்றார்
