மத்தியப் பிரதேசத்தின் தலைநகர் போபால் நகரில் பெண்ணை பாலியல் வன்முறை செய்த சம்பவத்தில் 4 குற்றவாளிகளை காவல்துறையினர் சாலையில் நடத்தி அழைத்துவரும் போது அவர்களை பெண்கள் தாக்கும் காட்சி வெளியாகியுள்ளது.
போபாலில் கடந்த நவம்பர் 3-ஆம் தேதி இந்திய குடிமை பணித்தேர்வுக்கு தயாராகி வந்த 19 வயது இளம் பெண்ணை அவரது நண்பர் கடத்திச்சென்று கூட்டு வன்கொடுமைக்கு ஆளாக்கினார். இந்த சம்பவம் தொடர்பாக சமீபத்தில் 4 பேரை காவல்துறையினர் கைது செய்தனர். அவர்களை காவல்துறையினர் சாலையில் நடக்க வைத்து அழைத்துச்சென்றனர்.
அப்போது, கூடிய இளம் பெண்ணின் உறவினர்கள், தோழிகள் 4 பேரையும் காலணி மற்றும் கம்பால் அடித்தனர். கூட்டத்திலிருந்த பெண் காவலரும் கைது செய்யப்பட்டவரை தாக்கினார். ஒருகட்டத்தில், கம்பு, காலணிகளை கைது செய்யப்பட்ட நபர்களிடமே கொடுத்த பெண்கள், அவர்களையே அடித்துக்கொள்ளவும் செய்தனர்.
