குஜராத்தில் கடுமையான வெயில் நிலவி வரும் நிலையில், மக்கள் மதிய வேளைகளில் வீட்டை விட்டு வெளியே வர வேண்டாம் என அதிகாரிகள் கேட்டுக்கொண்டுள்ளனர்.
தமிழகம் முழுவதும் கோடை வெயில் மக்களை கடுமையாக வாட்டி வருகிறது. மதிய வேளைகளில் வெளியில் செல்ல முடியாத அளவிற்கு, வெயில் உச்சத்தை காட்டி வருகிறது. குடை, தண்ணீர் இருந்தால்தான் மதிய வேளைகளில் வெளியே போக முடியும் என்ற நிலையில் மக்கள் உள்ளனர். தமிழகம் மட்டுமில்லாமல் இந்தியாவின் பல பகுதிகளிலும் இதேநிலை தான் நீடித்து வருகிறது. ஆந்திரா, கர்நாடகா, டெல்லி, ராஜஸ்தான், குஜராத் உள்ளிட்ட பல்வேறு மாநிலங்களில் கடுமையான வெயில் நிலவுகிறது.
இந்நிலையில் குஜராத்தில் கடுமையான வெயிலுக்கு நேற்று மட்டும் இரண்டு பேர் உயிரிழந்துள்ளனர். கடுமையான அனல் காற்றுடன் கூடிய வெயிலின் தாக்கத்தால் 300-க்கும் மேற்பட்டோர் பாதிக்கப்பட்டுள்ளனர். இதனிடையே வெயில் அதிகமாக இருப்பதால் மதிய வேளைகளில் வீட்டை விட்டு வெளியே செல்ல வேண்டாம் என அதிகாரிகள் கேட்டுக்கொண்டுள்ளனர்.
