ஆந்திர எக்ஸ்பிரஸில் ஏற்பட்ட தீவிபத்தில் 4 பெட்டிகள் எரிந்து சேதமடைந்தன.
ஆந்திர மாநிலம் விசாகப்பட்டினத்தில் இருந்து டெல்லிக்கு ஆந்திர பிரதேஷ் சூப்பர் பாஸ்ட் எக்ஸ்பிரஸ் தினமும் சென்று வருகிறது. இன்று, டெல்லியில் இருந்து புறப்பட்ட அந்த ரயில் விசாகப்பட்டினம் நோக்கி வந்துகொண்டிருந்தது. மத்திய பிரதேச மாநிலம் குவாலியர் அருகே உள்ள பிர்லாநகர் ஸ்டேஷனுக்கு காலை 11.50 மணிக்கு வந்த போது ரயிலில் திடீரென்று தீப் பிடித்தது. பி6 ஏசி கோச்சில் பிடித்த தீ, மளமளவென பரவி அடுத்தடுத்த பெட்டிகளுக்கும் பரவியது. அதில் இருந்த பயணிகள் வெளியேற்றப்பட்டனர்.
இதையடுத்து விரைந்து வந்த தீயணைப்புத் துறையினர் போராடி தீயை அணைத்தனர். யாருக்கும் காயமில்லை. இதில் 4 பெட்டிகள் சேதமடைந்துள்ளன. தீ விபத்துக்கான காரணம் உடனடியாகத் தெரியவில்லை. இதுபற்றி ரயில்வே அதிகாரிகள் விசாரித்து வருகின்றனர்.
