ஆந்திராவில் கள்ளச்சாராயம் குடித்து 10 பேர் பலியான சம்பவம் அதிர்ச்சியை ஏற்படுத்தியுள்ளது.
ஆந்திர மாநிலம் பிரகாசம் மாவட்டம் குரிசேடு கிராமத்தைச் சேர்ந்த சிலர் கடந்த புதன் கிழமை இரவு கள்ளச்சாராயம் வாங்கி வந்து குடித்ததாக தெரிகிறது. இதில் 50-க்கும் மேற்பட்டோர் மயக்கம் அடைந்ததால், அவர்களை அங்குள்ள அரசு மருத்துவ மனையில் சிகிச்சைக்காக அனுமதித்தனர்.
இதில் நேற்றிரவு 3 பேர் சிகிச்சை பலனின்றி உயிரிழந்தனர். இந்நிலையில், தற்போது மேலும் 7 பேர் உயிரிழந்துள்ளதால் பலி எண்ணிக்கை 10-ஆக அதிகரித்துள்ளது. மேலும் பலர் கவலைக்கிடமாக இருப்பதால், உயிரிழப்புகளின் எண்ணிக்கை உயரக்கூடும் என தெரிகிறது.
சாராயம் குடித்த இடத்தில் 20 கிருமி நாசினி டப்பாக்கள் இருப்பதால் கிருமி நாசினி கலந்து குடித்ததால் உயிரிழப்பு ஏற்பட்டிருக்கலாம் என காவல் துறையினர் விசாரணை நடத்தி வருகின்றனர்.
