மகாராஷ்டிரா மாநிலத்தில் ரயில்வே பாதையை 60 வயது முதியவர் ஒருவர் கடக்க முயன்றுள்ளார். அந்நேரம் ரயில் அந்த பாதையில் வர அவரை ரயில் விபத்திலிருந்து பத்திரமாக மீட்டுள்ளார் அங்கு பணியில் இருந்த ரயில்வே போலீஸ் காவலர் ஒருவர்.
மகாராஷ்டிராவில் உள்ள ரயில் நிலையம் ஒன்றில் ரயில் பாதையை முதியவர் ஒருவர் கடக்க முயன்றுள்ளார். அப்போது அவரது காலணி தண்டவாளத்தில் சிக்கி உள்ளது. அதை எடுத்து தனது காலில் மாட்டிக்கொண்டிருக்கும் நேரத்தில் ரயிலும் வந்துள்ளது. என்ன செய்வதென்று தெரியாமல் தவித்த அந்த முதியவர் சில நொடிகளுக்கு பிறகு பிளாட்பாரம் மீது ஏற சுதாரித்துக் கொண்டுள்ளார். ஆனால் பிளாட்பார்மின் உயரம் அதிகம் இருந்ததால் அவரால் துரிதமாக செயல்பட முடியவில்லை.
அப்போது அங்கு பணியில் இருந்த ரயில்வே போலீஸ் காவலர் ஒருவர் அதை கவனித்ததும் வேகமாக ஓடி வந்து அந்த முதியவருக்கு கைகொடுத்து பிளாட்பார்மில் இழுத்து போட்டார். இது அங்கிருந்த சிசிடிவி கேமிராவில் பதிவாகியுள்ளது. அந்த காட்சிகள் இப்போது இணையத்தில் பகிரப்பட்டு வருகிறது. சினிமா காட்சி போல இருக்கிறது அந்த வீடியோ. முதியவரும் காயம் ஏதுமின்றி தப்பித்துள்ளார். துரிதமாக செயல்பட்டு முதியவரைக் காப்பாற்றிய போலீசாருக்கு பலரும் பாராட்டுகளைத் தெரிவித்துள்ளனர்.
