சூர்யா நடிப்பில் சமீபத்தில் வெளியாகி பாராட்டுகளை குவித்து வரும் 'ஜெய் பீம்' திரைப்படம் ஐ.எம்.டி.பி (IMDB) வலைதளத்தில் புதிய மைல்கல்லை எட்டியுள்ளது.
த.செ.ஞானவேல் இயக்கத்தில் உருவாகியுள்ள சினிமா 'ஜெய் பீம்'. பழங்குடியின மக்கள் காவல்துறையால் அனுபவித்த கொடுமைகளை மிக அழுத்தமாக பதிவு செய்திருக்கும் இந்தப் படம் தமிழகத்தை தாண்டி நிறைவான பாராட்டுகளைப் பெற்று வருகிறது. பாராட்டுகளைத் தாண்டி இப்போது புதிய மைல்களையும் எட்டியுள்ளது.
சினிமா தகவல்களை கொண்ட புகழ்பெற்ற வலைதளம் ஐஎம்டிபி. ஹாலிவுட் தொடங்கி கோலிவுட் வரையிலான திரைப்படங்களின் விமர்சனங்கள், தகவல்கள், ரேட்டிங் இடம்பெற்றிருக்கும் தளம் இது. இந்த இணையதளத்தில் உலகளவில் அதிகப் புள்ளிகளைப் பெற்ற முதல் 250 படங்களின் ஐஎம்டிபி தரவரிசையில் நடிகர் சூர்யாவின் 'ஜெய் பீம்' படமும் தற்போது இடம்பெற்றுள்ளது.
உலக அளவில் முதல் 250 இடங்கள் கொண்ட அந்தப் பட்டியலில் 'தி ஷஷாங் ரிடம்ஷன்' படம் 9.2 மதிப்பீடுகள் பெற்று முதலிடம் பிடித்துள்ளது. மேலும், உலகின் புகழ்பெற்ற திரைப்படங்களான 'தி காட்ஃபாதர்', 'தி காட் ஃபாதர் 2' 'டார்க் நைட்', '12 ஆங்கிரி மேன்' `பாரசைட்', `ஜோக்கர்' உள்ளிட்ட பல்வேறு படங்கள் இடம்பெற்றுள்ளன. இந்திய அளவில் எடுத்துக்கொண்டால், பாலிவுட் சூப்பர் ஸ்டார் அமீர் கானின் '3 இடியட்ஸ்', தங்கல்', மற்றும் ஆயுஷ்மான் குர்ரானாவின் `அந்தாதூன்' ஆகிய படங்கள் மட்டுமே முதல் 250 இடங்களுக்குள் இடம்பெற்றிருந்தன.
இவை அனைத்தும் பாலிவுட் படங்கள். அதேநேரம் தமிழ் படங்கள் எதுவும் உலக அளவில் முதல் 250 படங்களுக்குள் இடம்பெற்றவில்லை. இதனை உடைத்து தற்போது `ஜெய் பீம்' முதல் தமிழ்ப் படமாக ஐஎம்டிபியின் உலகளாவிய தரவரிசையில் 166-வது இடத்தை பிடித்துள்ளது. இந்தப் படத்துக்கு 8.1 மதிப்பீடுகள் கிடைத்துள்ளன. 57,667 பேர் இந்தப் படத்துக்கு மதிப்பீடு கொடுத்துள்ளனர்.
ஆனால், சமூக வலைதளங்களில் சிலர் 'ஜெய் பீம்' திரைப்படம் 9.6 புள்ளிகளுடன் முதல் இடத்தை பிடித்திருக்கிறது என்றும், இந்தப் படத்துக்குப் பின் தான் 'தி ஷஷாங் ரிடம்ஷன்' திரைப்படம் 9.3 புள்ளிகளுடன் 2-ம் இடத்தில் உள்ளது என்றும் தவறாக பதிவிட்டு வருகின்றனர். 'தி ஷஷாங் ரிடம்ஷன்' படம் 24 லட்சம் வாக்குகளுடன் முதலிடத்தில் நீடித்து வருகிறது.
இந்திய அளவில் 'ஜெய் பீம்' முதலிடம்: அதேநேரத்தில், இந்தப் பட்டியலை இந்திய அளவில் எடுத்துக்கொண்டால், அதாவது இந்திய சினிமாவில் முதல் 250 இடங்கள் கொண்ட திரைப்படங்களில் `ஜெய் பீம்' முதலிடத்தை பிடித்திருக்கிறது. 8.9 புள்ளிகளுடன் 57,667 பேர் வாக்களித்து முதலிடம் பிடித்துள்ளது. இரண்டாமிடத்தில் பாலிவுட் நடிகர் விக்கி கெளஷல் நடிப்பில் சமீபத்தில் வெளியாகிய `சர்தார் உதாம்' திரைப்படம் 8.6 புள்ளிகளுடன், 25,513 வாக்குகளுடன் உள்ளது.
அதேபோல், முதல் ஐந்து இடங்களில் `ஜெய் பீம்' தவிர்த்து மேலும் மூன்று தமிழ்ப் படங்கள் இடம்பெற்றுள்ளன. மூன்றாம் இடத்தில் கமல்ஹாசனின் எவர்கிரீன் படமான `நாயகன்' 8.5 புள்ளிகளுடனும், நான்காம் இடத்தில் மாரி செல்வராஜின் `பரியேறும் பெருமாள்' படம் 8.5 புள்ளிகளுடனும், 5-ம் இடத்தில் `அன்பே சிவம்' புள்ளிகளுடனும் இடம்பெற்றுள்ளன. 12-ம் இடத்தில் விஜய் சேதுபதியின் 96' படமும், அதற்கடுத்த இடத்தில் கமல் - சிவாஜியின் 'தேவர் மகன்' படமும் உள்ளன.
- மலையரசு
