தமிழகத்தில் அடுத்த நான்கு நாட்களுக்கு கனமழை தொடரும் - வானிலை ஆய்வு மையம்

தமிழகத்தில் வரும் 30 ஆம் தேதி வரை கனமழை பெய்ய வாய்ப்பிருப்பதாக சென்னை வானிலை ஆய்வு மையம் தெரிவித்துள்ளது.

தமிழகத்தில் தொடர்ந்து பல மாவட்டங்களில் கனமழை பெய்துவரும் நிலையில், இன்று நீலகிரி, கோவை, தேனி, திண்டுக்கல் மற்றும் சேலம் ஆகிய 5 மாவட்டங்களில் மிக கனமழை பெய்ய வாய்ப்புள்ளதாகவும், திருவள்ளூர், ராணிப்பேட்டை, திருவண்ணாமலை, விழுப்புரம், கடலூர், செங்கல்பட்டு ஆகிய மாவட்டங்களில் கனமழை பெய்ய வாய்ப்புள்ளதாகவும் வானிலை ஆய்வு மையம் தெரிவித்துள்ளது.

அதேபோல், நாளையும், நாளை மறுதினமும், தேனி, நீலகிரி, கோவை ஆகிய 3 மாவட்டங்களில் அதீத கனமழை பெய்ய வாய்ப்புள்ளதாகவும் தமிழகத்தில் அடுத்த நான்கு நாட்களுக்கு கனமழை தொடரும் எனவும் தெரிவித்துள்ளது. திருவண்ணாமலை கலசப்பாக்கத்தில் 14 செ.மீ மழையும், காஞ்சிபுரம், வேம்பாக்கம் மற்றும் ஆரணியில் தலா 8 செ.மீ மழையும் பதிவாகியுள்ளதாக வானிலை ஆய்வு மையம் தெரிவித்துள்ளது.