புதுச்சேரி மாநிலம் மடுகரை அருகேயுள்ள நெட்டப்பாக்கம் வடுவக்குப்பம் கிராமத்தை சேர்ந்தவர் 38 வயதான பெண். இவர் தனது கணவரைப் பிரிந்து தனியே வாழ்ந்து வந்துள்ளார். இந்நிலையில் திடீரென கடந்த இரண்டு நாட்களாக அவர் மாயமாகியுள்ளார். அவரைத் தொடர்புகொள்ள எவ்வளவு முயன்றும் தொடர்ப்புகொள்ள முடியாமல் போகவே இது குறித்து அவரது உறவினர் ஒருவர் நெட்பாக்கம் காவல் நிலையத்தில் புகார் அளித்துள்ளார். புகாரின் பேரில் நெட்டப்பாக்கம் போலீசார் வழக்குப் பதிவு செய்து அப்பெண்ணைத் தேடி வந்துள்ளனர்.
இந்நிலையில், திருவக்கரை பகுதியில் பெண் ஒருவர் சாக்குமூட்டையில் சடலமாகக் கிடப்பதாகப் போலீசாருக்குத் தகவல் கிடைத்துள்ளது. உடனடியாக சம்பவ இடத்திற்கு விரைந்த போலீசார் சாக்குமூட்டையைக் கைப்பற்றி ஆய்வு செய்துள்ளனர். சாக்குமூட்டையில் அடையாளம்தெரியாத பெண்ணுடல் இருந்ததைக் கண்டு அதிர்ச்சி அடைந்த காவல் துறையினர் அப்பெண்ணின் உடல் யாருடையது? அவரைக் கொலை செய்தது யார்? எதற்காக அவர் கொலை செய்யப்பட்டார் என்னும் கோணத்தில் விசாரணையைத் தொடங்கியுள்ளனர்.
அதில் நெட்டப்பாக்கம் காவல் நிலையத்தில் காணாமல் போனதாகப் புகார் பதியப்பட்ட பெண் இவர்தான் என்பது தெரியவந்துள்ளது. உடனடியாக அப்பெண் குறித்து விசாரணை செய்ததில் அவர் கடந்த 8 வருடங்களாக நெட்டப்பாக்கத்தில் உள்ள வடுவக்குப்பம் கிராமத்தில் லாரி டிரைவராக இருந்த ராஜூ என்பவருடன் பழகி வந்தது தெரியவந்துள்ளது. ராஜுவின் மீது போலீசாரின் சந்தேகப் பார்வை திரும்பவே அவரைக் கைது செய்த போலீசார் அவரிடம் விசாரணை நடத்தியுள்ளனர். அதில் பல திடுக்கிடும் தகவல்கள் தெரியவந்துள்ளன.
சம்பவ தினத்தன்று கொலை செய்யப்பட்ட பெண்ணும் ராஜூவும் சந்தித்துப் பேசிய போது இருவருக்குள்ளும் வாக்குவாதம் ஏற்பட்டுள்ளது. ஒருகட்டத்தில் வாக்குவாதம் முற்றவே ஆத்திரமடைந்த ராஜு அப்பெண்ணைத் தாக்கியுள்ளார். இதில் மயங்கி விழுந்த அப்பெண் சம்பவ இடத்திலேயே பரிதாபமாக உயிரிழந்துள்ளார். பிறகு என்ன செய்வதென்று தெரியாத ராஜு அவரது சடலத்தை அப்புறபப்டுத்த எண்ணி சாக்குமூட்டையில் கட்டி தமிழக பகுதியான திருவக்கரை பகுதியில் தூக்கி வீசிவிட்டுச் சென்றுள்ளார். இதனை தொடர்ந்து ராஜுவை கைது செய்து, நெட்டபாக்கம் போலீசார் விசாரணை நடத்தி வருகின்றனர்.
