தாம்பரம் அருகே பெருங்களத்தூரில் லாரி டிரைவர் தூங்கியதால் அடுத்தடுத்து 2 அரசு பேருந்து உட்பட 4 வாகனங்கள் மோதி விபத்து ஏற்பட்டது.
சென்னை தாம்பரம் அடுத்த பெருங்களத்தூர் பேருந்து நிலையம் முன்பு சேலத்தில் இருந்து சென்னைக்கு மைதா மாவு ஏற்றி கொண்டு லாரி ஒன்று வந்து கொண்டிருந்தது. அப்போது லாரி டிரைவர் வெங்கடாச்சலம் திடீரென கண் அசந்துவிட்டதாக கூறப்படுகிறது. அப்போது பெருங்களத்தூர் பேருந்து நிலையத்தில் நின்று கொண்டிருந்த 2 அரசு பேருந்துகள் உள்ளிட்ட 4 வாகனங்கள் மீது லாரி மோதி விபத்து ஏற்படுத்தியது. இதில் அரசு பேருந்துகள் உள்ளிட்ட வாகனங்கள் சேதமடைந்தன.
மேலும் பெருங்களத்தூர் சிக்னலை கடக்க முயன்ற பொதுமக்கள்மீது லாரி மோதியதில் 3 பேர் படுகாயமடைந்தனர். இதில் பீர்க்கன்காரணை சேர்ந்த பத்மநாபன் என்பவர் குரோம்பேட்டை அரசு மருத்துவமனைக்கு கொண்டுசெல்லும் வழியில் உயிரிழந்தார். மேலும் காயமடைந்த அதே பகுதியை சேர்ந்த மணிகண்டன், டெல்லிபாபு ஆகியோர் அரசு மருத்துவமனையில் சிகிச்சைகாக அனுமதிக்கபட்டுள்ளனர்.
விபத்து குறித்து குரோம்பேட்டை போக்குவரத்து புலனாய்வு பிரிவு போலீசார் வழக்குப்பதிவு செய்து, விபத்தை ஏற்படுத்திய சேலம் அய்யம்பேட்டையை சேர்ந்த லாரி ஓட்டுநர் வெங்கடாசலத்தை கைதுசெய்து விசாரணை நடத்தி வருகின்றனர்.
