போனி கபூர் தயாரிப்பில் ஹெச்.வினோத் இயக்கத்தில் அஜித் நடித்த திரைப்படம் நேர்கொண்ட பார்வை. மக்களிடையே நல்ல வரவேற்பை பெற்ற
நிலையில் அதே கூட்டணியுடன் அஜித் மீண்டும் இணைந்தார்.
வலிமை எனப்பெயரிடப்பட்ட திரைப்படத்தை தொடங்கினார் இயக்குநர் வினோத். இந்த திரைப்படத்தில் அஜித் இருவேடத்தில் நடிக்க உள்ளதாகவும், அதில் ஒன்று போலீஸ் கதாபாத்திரம் என்றும் கூறப்பட்டது. இதற்கிடையே வித்தியாசமான மீசை கெட்டப்புடன் இருந்த அஜித்தின் புகைப்படம் இணையத்தில் பரவியது.
அதற்கு பின் வலிமை படத்தின் ஷூட்டிங் பூஜையுடன் தொடங்கியது. முதற்கட்ட படப்பிடிப்பு ஹைதராபாத்தில் உள்ள ராமோஜி பிலிம் சிட்டியில்
நடைபெற்றது. இந்நிலையில் ஹைதராபாத் படப்பிடிப்பு நிறைவடைந்துள்ளதாக தகவல்கள் வெளியாகியுள்ளன.
இரண்டாம் கட்ட படப்பிடிப்பு சென்னையில் உள்ள ஸ்ரீகோகுலம் ஸ்டூடியோவில் நடைபெறவுள்ளதாகவும், இதற்காக மிகப்பெரிய செட்
அமைக்கப்பட்டுள்ளதாகவும் கூறப்படுகிறது. இந்நிலையில் படத்திற்கு இசையமைப்பாளராக ஒப்பந்தமான யுவன்சங்கர் ராஜா மாற்றப்பட்டதாகவும்,
விஸ்வாசம் திரைப்படத்துக்கு இசையமைத்த இமான் இசையமைப்பாளராக ஒப்பந்தமாகியுள்ளதாகவும் இணையத்தில் செய்தி பரவியது. ஆனால் யுவன் சங்கர் ராஜா மாற்றப்பட்டதாக அதிகாரப்பூர்வமாக செய்தி ஏதும் வெளியாகவில்லை.
இதற்கிடையே இசையமைப்பாளர் குழப்பத்திற்கு விளக்கம் அளிக்கும்படியும், வலிமை படம் தொடர்பாக ஏதும் அப்டேட் விடும்படி தயாரிப்பாளர் போனி கபூரை டேக் செய்து அஜித் ரசிகர்கள் கோரிக்கை விடுத்து வருகின்றனர்.
